ORANJESTAD (AAN): Diabierna mainta pa alrededor di 8:30 am, un unidad di Polis di Playa a mira con e chauffeur femenino di un Toyota Yaris color blauw ta bayendo pariba riba e caminda di Tanki Flip.
E auto pues ta bayendo direccion Tanki Leendert y Paradera.
E unidad di Polis claramente a mira con e chauffeur femenino tin un Smartphone den su man, mientras e ta tras di stuur coriendo.
Polis a core duna e chauffeur un señal pa stop segun ta poni den Articulo 3 di Ley di Trafico.
E dama chauffeur a hala un banda y stop tambe. Polis a bin bise cu nan a mire ta core cla-cla cu un smartphone den man, siendo cu esey awor ta un violacion di Ley di Trafico.
Polis a dune un multa pasobra e ta coriendo cu Smartphone den man. E ley aki a wordo introduci pa asina evita cu accidentnan ta wordo ocasiona pa chauffeurnan cu tin nan mente riba e smartphone envez di trafico. A sugeri pa usa handsfree sets cu tin costo hopi abao pa haci yamada ora di core auto.
Riba website di Ministerio Publico di Aruba, ta poni cu e violacion di Articulo 7A di Ley di Trafico, esta core auto cu un Smartphone teni den bo man, ta conecta cu un multa di 500 Florin. Si acaso bo opta pa bay pleita e caso dilanti Huez, aki Fiscal lo exigi un multa di 600 Florin, y si bo perde e caso, esey ta loke bo tin di paga.
