ORANJESTAD (AAN): Diabierna atardi algo prome cu 2’or di merdia, habitantenan a tende un sonido masha duro mes.
A bin mira pafo cu dos auto a dal den otro. Pa 1:57 pm central di polis a wordo notifica di un accidente frontal entre dos auto na altura di Cura Cabay na San Nicolas.
Patruya a despacha cu maximo urgencia pa e lugar di accidente. Na yegada agentenan a mira cu e accident ta entre un Suzuki Swift color blanco, y un Toyota Yaris color geel. Un biaha mas Polis a pidi presencia urgente di Ambulans como cu tin varios herido. Lamentablemente personal di ambulans no por a haci nada mas pa e chauffer masculino den e Toyota Yaris cu a bay pega contra un pickup dilanti un cas..
Pa 3:15 pm Dr. Texier ta constata morto di John Davis , naci na Aruba di 57 aña di edad. Su profesion ta mecanico y ta biba na Yuwana Morto.
Specialista di trafico y polis tecnico a yega na e lugar pa haci nan investigacion. Slachtofferhulp tambe a acudi na e sitio pa brinda sosten na e famianan cu ta involucra den e accidente pisa aki.
DIARIO como tambe Cuerpo Policial Aruba ta manda palabra di profundo condolencia na famia di e fayecido. Un mensahe na tur chauffeur pa bay trankilo den trafico. Bo famia ta warda bo na cas.
Esaki ta bira e di dos morto den trafico pa loke ta aña 2021. E potret cortesia di KPA.
