Polis pensando cu por ta ladronnan activo na Eagle Beach
ORANJESTAD (AAN): Diamars mainta pa 10:45 am, ora cu unidad di Strandpolitie ta riba e caminda secundario y paralelo cu Irausquin Boulevard cerca di lama na Eagle Beach, net ora cu nan ta yegando na otro banda di Oceania Residences, nan a mira un Nissan Skyline color maron cu ta para na e parkinglot di Eagle Beach, cu cuatro hoben aden.
Polisnan a mira cu e chauffeur tin un petchi preto, y e auto ta para net na e lugar unda ultimo lunanan varios mercancia di turista a wordo horta riba beach. Polisnan a actua normal y a djis sigui core direccion zuid. Pero nan a lesa e nummerplaat y a dicidi pa controla esaki via e Computer di Polis cu ta conecta cu DIMP.
E number a resulta cu e ta registra riba un auto color preto Honda CRV. For di leu, Polisnan a constata cu e chauffeur a reverse e auto, saca esaki for di lugar di staciona y a bay tambe den direccion zuid.
PERSECUSION A START: Polisnan a duna e chauffeur señal pa para, pero e persona den e Nissan maron no a cumpli cu ordo y el a trot bay na banda drechi y a pasa patruya cu velocidad.
Yegando na final di e cruzada-T forma pa Eagle beach y J.E. Irausquin Boulevard, e vehiculo a tuma direccion panort. Polisnan a sigui tras di e vehiculo cu intencion pa para esaki.
Na cruzada entre MVC Eagle Beach Aruba y Chalet Suisse, e tabata bay demasiado duro, y ora cu e chauffeur kier a bira su auto pa bay pariba, e vehiculo a hala na man drechi, a slip, pasa riba e isla chikito di caminda, y bay pega riba un palo di kwihi. Esey ta demostra cu e chauffeur ta un hoben sin experiencia di core auto. E Nissan Skyline a kibra bastante parti dilanti den e palo di kwihi.
Polisnan cu ta net nan tras, a mira con cuater homber a bula sali for di e Skyline y nan a cuminza huy, excepto uno. Un di e hombernan a core bin den direccion di e Unidad di Polis banda di e Polis cu ta manehando, y e tabata histerico, hostina, rabia y agresivo, y tabata stroba e Polis aki di baha. Mientras e otro hobennan tabata core bay direccion pariba.
Despues e homber histerico aki tambe a cuminza core direccion pariba rumbo Chalet Suisse. Ora cu Polis a core su tras, el a mira con un di e hobennan bisti cu T-shirt preto cu petchi preto, a zwaai un obheto benta cerca di un palo di kwihi cu tin pazuid di Chalet Suisse.
Finalmente Polis a para dos hoben na e muraya net panort di MVC Eagle Beach. Mesora a check cu Fiscal pa dicidi kico pa haci cu nan, y tambe pidi permiso pa listra den e Nissan Skyline. Fiscal a duna OK.
DEN E AUTO: Polis cu autorizacion di Fiscal a bay controla den e auto Nissan Skyline kibra. A bin haya dos smartphone, esta un Samsung color blauw, y un Samsung color preto. Tambe un smartphone Nokia color blanco. Polis a puntra e hobennan deteni, na kende e smartphone ta pertenece, pero nan no tabatin contesta.
E smartphonenan a wordo warda na Warda di Polis na Strandpolitie pa investigacion.
Polisnan a bay check rond di e palo di kwihi, unda un agente a mira con un di e hobennan a zwaai un obheto den e direccion ey. Riba tera panort di e kwihi tabatin un smartphone Samsung color preto. Esaki tambe a wordo confisca.
Pabao di e auto, a bin haya un sakito di plastico transparente conteniendo yerba parecido na Marihuana. Pariba di e auto a bin haya un sakito di plastico conteniendo pidanan chikito parecido na cocaina. Tur esakinan a wordo confisca, pa asina wordo entrega na personal anti-droga di U.G.C.
A confisca e Nissan Skyline pa investigacion. Y net ora cu Takelwagen a yega pa bay cu e Nissan pa hibe Warda di Polis, un funcionario policial a mira un homber desconoci ta sali for di e mondi panort di Chalet Suisse y cuminza cana. E homber lomba sunu a cuminza cana bay pabao rumbo pa e Truck di Mama.
Polisnan di Strandpolitie a reconoce e homber cu ta esun cu a sali histerico for di e Nissan Skyline y a hasta bay stroba Polis di baha door di pusha y evita cu e port ata habri.
Di sorpresa Polis a yega riba dje banda di Truck di Mama. Polis a ripara cu ainda e homber aki ta agresivo, rabia, y no ta cooperando cu nada. Polis a sospecha cu e persona aki ta bao influencia pisa di droga e mainta ey.
Pa por calma e persona aki, y debi cu el a viola articulo 3.4 di Codigo Penal di Aruba, el a keda deteni. Net ora cu e personal ta sigui cu e detencion aki, a drenta informe di otro Polisnan, cu un arma di candela a wordo haya patras di Chalet Suisse, specificamente bao di un auto.
A bay check e caso aki, y tabatin algun pieza di un arma di candela banda di un Nissan Versa color silver. Banda di e auto aki tabatin un Toyota Yaris blanco staciona, y bao di dje a bin haya un pistol color preto. Banda di e Toyota Yaris a haya abao cuatro bala cayente.
E arma y tur e pieza di esaki, a wordo confisca. Oficialnan hudicial forensico di BFTO tambe a yega eynan pa confisca e arma y demas articulonan y e bala. Ta riparable cu e lugar unda cu a haya e armanan aki benta abao, ta net e lugar unda e homber histerico a sali for di mondi.
Autoridad ta investigando si acaso porfin a logra pone man riba algun ladron di smartphone di turistanan. Si acaso abo ta uno cu nan a horta bo smartphone ultimo dianan, bo por bay Warda di Strandpolitie pa check si uno di nan ta di bo.
