Dalmento fuerte cu hende herida na Macuarima  

ORANJESTAD (AAN): Diahuebs den oranan merdia, Central di Polis a core dirigi un patruya di Santa Cruz

pa bay net na e cruzada dilanti 88Food Mart na Macuarima, como cu un accident a socede eynan y tin hende herida.

   Ora cu Polis a yega, nan a bin topa cu un vehiculo SUV Chevrolet Captiva color cora cu number A-43206, y un auto compacto Suzuki Swift blanco cu number A-56561.  A core check y nota cu tin dos hende herida den e SUV Chevrolet Captiva.  Ta trata di un señora na stuur, y un menor di edad sinta patras.

   Ora cu Ambulans a yega, paramediconan a bay check tambe e chauffeur di e Suzuki Swift.

   Indicacion ta cu e Chevrolet Captiva ta bin for di Santa Cruz y bayendo zuid direccion Balashi, ora cu inespera e Suzuki Swift a sorteer su dilanti pa bay pabao direccion Papilon.  Nan a dal den otro, ranca un borchi di trafico y finalisa riba e isleta unda tin un palo di luz.  Chevrolet Captiva a haya mayoria sla parti dilanti, y e Suzuki Swift a haya mayoria daño na su banda drechi.  Sinembargo ta e rapport di sea Polis of Roadservice lo bay presenta e conclusion final di e investigacion.

   Ambos vehiculo a sufri inmenso hopi daño material.