Curasoleño gara cu 218 kilo di cocaina riba lama

WILLEMSTAD: Tabata Diamars anochi, cu Centro MOC di Wardacosta di Caribe Hulandes a detecta riba radar un movimento sospechoso di boto den cercania di isla di Curaçao.

   Mesora e Centro Operacional Maritimo aki a despacha un speedboat special Metal Shark, y tambe a laga un Helicopter lanta vuelo pa bay mira kico ta pasando.

   Ora cu e oficialnan aki a yega den e area, nan a bin ripara cu ta trata aki di un boto tipo ‘Yola’, nabegando entre Klein Curaçao y Curaçao.  E tin dos Yamaha outboard engine, y tres bari grandi cu combustibel.

   Nan a stop e boto, y bao di escolta nan a trece e boto aki na e Pier di Wardacosta pa haci investigacion.  Mientras tanto Polis y Aduana di e isla a yega tambe.

   Den e boto a djis haya algun pisca.  Pero a dicidi na investiga mas profundo, y a bin resulta cu tin algun espacio scondi den e boto aki.  Asina a bin dal den monton di pakete yena cu cocaina.  Pues ni maske a trata di sconde nan, toch a haya nan.

   E peso total a yega na 218 kilo di cocaina.  Mesora a aresta e capitan di e boto ‘Yola’ aki, cu ta un homber Curasoleño.  Hunto cu tur pakete di cocaina, el a wordo pasa pa Polis di Curaçao.

   Mesora a pasa pa destrui e droga, y e boto a keda confisca.  Awor ta sigui interoga e persona pa haya sa con el a haya e droga riba lama, y pa kende e ta destina.