Cuerpo di Bombero a combate candela grandi riba tereno di Refineria

Accion conhunto di Polis, Brandweer y CMO

ORANJESTAD (AAN): Diaranson mainta, Central di Polis a ricibi un yamada urgente cu tabata indica cu tin un candela grandi na un parti di tereno di refineria cerca di panelnan solar na San Nicolas. Mesora a manda Polis y Brandweer pa atende e situacion.

Na momento cu Polis y Brandweer a yega na luga, nan a topa cu candela basta grandi y huma denso. OVD (Officier van Dienst) di Brandweer a informa Polis pa seguridad di e habitantenan di e bario, pa nan evacua temporalmente te ora cu e situacion di candela ta bao di control y asina nan por regresa nan cas.

Polis a cera diferente caminda den becindario, no solamente pa evita trafico y mirones yega cerca y pa nan mesun seguridad, pero pa unidadnan di emergencia por tin e camindanan liber pa mobilisa. Esaki a permiti cu Brandweer y Polis por mobilisa tur nan personal y ekiponan sin obstaculo.

Despues di hopi esfuerso, nan a logra domina e candela. Pero den oranan di merdia, biento fuerte a haci cu yerba seco den tereno pega candela bek. Un otro parti di e tereno cu tabatin mas yerba seco a pega candela mesora. Den cuestion di algun minut, un parti grandi di e tereno tabata na candela bek y cu huma denso, cu a obliga autoridadnan pa reorganisa y traha strategicamente pa seguridad di nan mesun personal y e refineria.

OVD di Brandweer, hunto cu OVD di Polis y personal di Crisis Management Office (CMO), a reuni rapidamente pa  evalua e situacion. Nan a dicidi cera hopi caminda estrategico y prepara pa posibel evacuacion mas extenso si e situacion empeora. Commando Mobile di Polis a wordo activa pa garantisa un coordinacion estrategico.

Polis tambe a desplega nan drones pa por tin un bista mas amplio di e situacion di e candela for di aire, cu sigur a yuda autoridadnan wak claramente unda e candela tabata move y su intensidad.

Despues di oranan di largo cu Brandweer a bringa cu e candela pa 4:30 di atardi e instancianan a bolbe reuni pa evalua e situacion. E candela tabata bao control y a dicidi cu no tabatin mas peliger inmediato pa e bario, y habitantenan cu a evacua por bolbe bek na nan cas.

Polis a pidi e habitantenan cu a wordo afecta pa e huma pa tene nan cas ventila. Nan ta recomenda pa habri porta y bentananan pa laga aire fresco pasa y elimina e holor fuerte di huma. Despues, por cera e cas bek manera normal.

E situacion aki a mustra un biaha riba e mas importancia di accion rapido y coordinacion sublime entre Polis, Brandweer y CMO. Segun vocero di Cuerpo Policial, Liliana Rasmijn, na final di un dia largo Cuerpo di Bombero a logra domina e candela totalmente.