ORANJESTAD (AAN): Diadomingo den oranan hopi trempan di mainta, Polis ta wordo informa cu un vehiculo a cay den greppel net na e cura pazuid di Metro Mall, cu ta pabao di Sasaki Service Station.
Ora cu polis a yega, a bin topa cu un vehiculo tipo SUV color preto benta den e greppel cu tin entre e rotonde di Sasaki Service Station, y e rotonde di Avenida Nelson Oduber.
Ta trata aki di un Toyota Prado color preto cu number A-64818 cu testigonan a splica Polis, tabata coriendo malo Riba Avenida Nelson Oduber for di e rotonde di Guardian Group Fatum ta bin panort.
El a subi rotonde banda di Eagle Bowling Palace cu velocidad halto, y ora di kita pa drenta caminda cu ta bay pariba direccion Tanki Flip, el a tuma e birada mucho hancho y a bay den trafico contrario y dal den un Hyundai Accent color blanco cu number A-7260 cu ta yegando rotonde. Cu e impacto y momentum di su birada, e Toyota Prado a sigui bay den direccion contrario, baha na man robez di caminda y bay bolter den e greppel. El a keda cu su cuatro wielnan na halto, cerca di e muraya di Metro Mall.
Polis a atende cu e chauffeur cu a resulta herida. A pidi pa ambulance y na yegada Paramediconan a haya cu e chauffeur mester bay Hospitaal.
Un persona den Accent a ser atendi door di Paramedico na e sitio mes.
https://diario.aw/ar/categories/noticia/policial/chauffeur-coriendo-na-forma-iresponsabel-a-dal-den-un-auto-y-despues-bolter#sigProIdaffd372530
