Chauffeur burachi a ocasiona accident na Calbas cobrando bida di hoben futbolista

Dalmento frontal entre auto y brommer

• Jefferson Lopes di 28 aña a muri instantaneamente
• El a bira e di 6 morto den trafico pa 2024

ORANJESTAD (AAN): Tabata banda di 1:30 pm, cu Central di Polis a ricibi yamada pa indica cu riba e pida caminda cu ta situa na un parti interior di Calbas bay nort, como 100 meter patras di Calbas Ballpark tin un accident basta grave entre auto y un motorcycle.

   Mesora Central di Polis a dirigi unidad di Polis di Noord pa e lugar, y a pone Centro di Alarma na altura pa cuminsa despacha Ambulans pa e lugar ey.

   E prome unidad di Polis cu a yega, a bin haya un auto compacto BYD modelo F0 color blanco mey-mey di caminda dilanti e cas Calbas 19-A, cu un motorcycle kibra su dilanti.

   Banda pariba di caminda, net na e cura di cas Calbas 43, autoridad a mira e victima benta abao.  Polis a core baha bay check, y a mira cu e persona aki abao na e cura di cas ta mustra di ta gravemente herida, y a core pidi pa Ambulans yega cu maximo urgencia.

   Mas unidad di Polis a yega pa asina cera e caminda, y pa yuda haci investigacion.

   Chauffeur ta burachi: Polis a acudi na e chauffeur di e auto BYD modelo F0 hatchback aki, cu number A-59462 y nan a bin nota cu e ta herida, aunke no grave.  Riba porta robez di e auto tin emblema di un compania local di Security.  Papiando cu e chauffeur, nan a bin nota cu e ta mustra di ta bao influencia di alcohol.  Tur cos ta mustra cu el a bay core demasiado mey-mey di caminda y hasta a hala basta na su man robez, y pesey a bay den caminda di e motorcycle cu ta bin di direccion contrario.

   E motorcycle a bay dal semi-frontal, na e banda robez di e auto, y e manehador mes a zwaai y sali cay pariba di caminda.  Su motorcycle cu number MFA-2491 a bons y keda benta abao dilanti e auto.

   Ora cu Ambulans a yega, mesora Paramediconan a bay check e victima, pero a bin nota cu e no tin ningun señal vital mas.  A pidi Centro di Alarma pa manda busca Docter, y pa respet a pone paña blanco riba dje.

   Polisnan mesora a solicita pa autoridadnan halto yega eynan, y a pidi pa profesionalnan di Bureau Slachtofferhulp tambe yega.

   Docter a yega eynan, y pa 2:10 pm, Dr. Texier a constata morto di e hoben Jefferson Manuel R.  Lopes, naci na Aruba dia 5 di November 1995, pues tin 28 aña di edad.  E ta un hoben activamente den Futbol di Aruba, hungando pa teamnan grandi manera di SV RCA y tambe SV Caiquetio.  Conoci pa su habilidad y tremendo intuicion riba veld durante wega.

   E chauffeur di Toyota BYD F0 color blanco numera A-59462  a worde transporta pa  hospital pa haya asistencia medico y a keda deteni pa maneha bao di influencia. 

  Specialista di trafico a presenta na e lugar como tambe team forensico di BFTO pa haci nan investigacion. 

   Momento dificil ora cu famianan a yega y bin haya nan ser keri eybao benta.  Personal di Slachtofferhulp a duna un man pa sostene famia den e momento dificil aki.

   Funeraria a yega eynan pa busca e restonan mortal di Jefferson.

   Jefferson a bira e di 6 morto den trafico insigur na 2024 na Aruba.  Na famia di e fayecido, tanto DIARIO como Cuerpo Policial ta manda palabra di condolencia.