ORANJESTAD (AAN): Tabata Diasabra anochi banda di 8:30 pm, cu Central di Polis a haya tip cu na altura di
Palm Beach Plaza Mall tin un grupo di cinco hoben ta “hang” e anochi ey, pero uno di nan tin un machete den su poder.
Na caminda pa e lugar, Polis a haya extra informacion cu e grupo di hoben a caba di subi nan bicicleta y ta coriendo rumbo pa Palm Beach. Unidad di Polis a mobilisa den e direccion ey, y move bay pariba rumbo pa Noord.
Na altura di Monserat, e unidad di Polis di Noord a mira un grupo di cuatro hoben kendenan ta moviendo riba nan bicicleta y ta bin den direccion di agentenan. Ningun bicicleta tabatin luz. Polis a cende nan zwaailicht y a ordena nan pa stop.
Pero e hobennan tur a actua comosifuera nan no ta bay stop. Polis a baha di nan unidad y a trata di gara y pone nan stop. Na final un di e hobennan si a logra huy. Pero e otro tres hobennan a keda wanta eynan. Tur tres hoben tabatin na curpa tur na sudor y ta mustra di ta basta cansa. Tur nan cara tabata mustra di ta tur sushi, y tabata comporta nan mes hopi nervioso.
A base di e informacion ricibi, nan a rista tur tres hoben. Riba curpa di un hoben bisti cu T-Shirt preto y short cora, a bin haya un cuchiu di cushina colga na su heup drechi. Den su schoudertas a bin haya un sakito transparente conteniendo marihuana.
Riba curpa di un hoben cu T-shirt berde y short shinishi, a bin haya un brass knuckle (yama tambe tin biaha ‘skinop’ of ‘boksbeugel’ manera por mira riba e potret) den su saco di carson banda robez. Polis a sigui coba mas profundo den e saco di carson, y ata un sakito transparente di marihuana a sali cay na suela.
Un otro hoben bisti cu bril, no a haya nada particular den su poder. E hoben aki a wordo hiba Warda di Polis na Shaba unda su tata por a bay busk’e despues.
Pero e hoben cu T-shirt preto, y esun cu T-shirt berde a wordo deteni eynan pasobra a viola Articulo 4 di Ley di Droga, y Articulo 1 di Ley di Arma. Polis a confisca e cuchiu cu tin largura di 30 cm, e brass knuckle (yama sea Skinop of Boksbeugel), y e droga tambe. Tur tres bicicleta a wordo hiba Warda di Polis na Strandpolitie unda e doño legitimo por bay busca nan.
Na final a pone Central di Polis na altura.
