A haya droga den su poder
ORANJESTAD (AAN): Diasabra marduga banda di 3:15 am, durante cu unidad di Polis di San Nicolas ta coriendo riba caminda di asfalt na Brazil, yegando na e T-weg di Brasil cu Caya Bernadina Growell, e agentenan a mira un Toyota color blanco cu tabata bin for di pabao riba Caya Bernadina Growell.
Na e T-weg el a bira pa bay na man drechi, pero ora el a haci esaki, el a tuma un birada hopi grandi pa bay na man drechi. Debi na esey su auto a bin den e via contrario banda robez, y despues el a djis sigui core na banda robez den direccion di e patruya di Polis. E Polis tras di stuur a haye ta hala na su man drechi rapidamente pa evita nan boks den otro.
Pero e Toyota blanco a pasa hopi cerca mes di e unidad policial. El a sigui core sin worry cu nada riba e caminda di Brazil.
Polisnan a bira y a bay tras di e Toyota aki. Nan a nota cu e persona tras di stuur a cuminza core mas duro direccion zuid. Y el a logra acelera y move basta leu for di Polisnan.
Relaciona cu esaki, Polisnan a solicita yudanza di mas unidad policial. Ora cu nan a yega cerca di Yong Shen Supermarket na Brazil, Polisnan a logra yega mas cerca y a duna e persona varios biaha un señal pa e stop. Pero e persona tras di stuur a djis sigui ignora Polisnan. E Toyota no tin tinted windows, y pesey Polis a nota cu ta djis un hende tin den e auto.
Ora cu a yega na e cruzada di caminda principal, e Toyota a djis hisa benta subi caminda sin duna preferencia na demas trafico. Pues e ta di berdad causando peligro riba caminda.
Bayendo pariba den Bernhardstraat, diripiente e auto a stop mey-mey di caminda. Y despues a bolbe sigui bay pariba riba Bernhardstraat.
Na altura di Nisibon Snack, Polis a cuminza dirigi palabra na e persona usando nan loudspeaker. Ni asina ainda e persona no a cumpli cu e ordo pa stop, y a djis sigui core bay pariba.
Yegando na e T-weg cu Zeewijk, el a bira bay zuid y atrobe Polisnan via loudspeaker ta bise pa e stop. Diripiente el a bira na man drechi y a drenta cura di un cas na Zeewijk.
Polisnan a core baha di nan unidad, y a bay na e Toyota. E persona a habri su porta, y aki por a nota cu e persona ta move masha poco-poco mes. Diripiente e persona tras di stuur a cuminza grita cu el a yega cas, y e no sa kico ta pasando.
A base di tur esaki, Polis a acerca y detene e homber di inicial S. como sospechoso di viola Articulo 3 (no a stop pa ordo di Polis) di Ley di Trafico, y Articulo 2 di Ley di Trafico. Poco rato despues mas refuerzo a yega eynan na e cas.
Polisnan e ora a bay controla e auto. A bin topa cu un potchi transparente di glas conteniendo marihuana poni den cupholder di e middleconsole di e Toyota. Tambe a mira un caha poni abao na piso di e banda di chauffeur. Den e caha a bin haya varios resto di marihuana, y un sker blauw.
Pues e ta wordo deteni pa viola Articulo 4 di Ley di Droga. Tur e droga a wordo confisca. Riba e asiento di pasahero tabatin un ice-jug blauw chikito conteniendo un boter grandi di whisky.
E homber S. a wordo transporta pa Warda di Polis na San Nicolas, unda ordo a ser duna pa e keda encarcela pa mas investigacion. E droga a wordo entrega na Unidad di Crimen Organiza (UGC) pa investiga.
