Caso serio na Sabana Liber
ORANJESTAD (AAN): Diadomingo mainta pa 8:50 am, un unidad di Polis di Noord a ser manda na Sabana Liber pa un situacion sospechoso.
Ora cu e unidad di Polis a yega na e adres, nan a papia cu e habitante. E ciudadano di inicial F. a declara cu Diasabra anochi banda di 9:00 pm el a bay drumi.
Diadomingo banda di 7:00 am el a spierta. E ora ey el a ripara cu tin un buraco den blafon di su camber. E buraco aki ta desconoci pe, como cu e blafon ta uno nobo recien instala.
El a lanta di cama y a bin topa cu un proyectil na rand di e bentana di su camber. Pesey el a core yama Polis.
E ciudadano a duna Polis permiso pa nan drenta e cas y haci un investigacion. Na e banda drechi patras di e cas, e agentenan a drenta via e garashi na porta di cas. Ora cu a drenta e cas, na e banda drechi tin e camber unda e ciudadano tabata drumi. Na rand di e bentana a bin haya un bala mas grandi cu un 9mm. E blafon blanco tin un buraco door di dje. Na e muraya banda panort di e camber, agentenan a mira un rasca.
Polisnan a bay subi e dak tambe pa check si tin mas rastro. A bin haya un buraco den e dak di aluminio. E buraco ta mustra di ta uno caminda e proyectil a drenta bay paden, y cu e lo a bin for di direccion zuid-oost di e cas.
Aentenan a yama Central di Polis pa asina pidi pa e Team Forensico di BFTO por bin eynan pa tuma tur dato y saca potret, y midi.
E ciudadano F. tambe a keda busca tur rond di su cas, pero no a haya nada particular mas. Recherche di Noord tambe a yega pa sigui cu e investigacion.
