ORANJESTAD (AAN): Diadomingo marduga, polis a reacciona riba un melding relaciona c'un situacion preocupante di maltrato den un Suzuki Liana, cu lo a tuma luga patras di Cas di Cultura.
E vehiculo a worde haya cu daño, pero e supuesto dama envolvi no a wordo haya na e luga di e suceso.
Den nan investigacion, polis a nota cu e porta di pasahero tabata habri, y nan a logra tira bista den e auto, notando indicacionnan di posibel maltrato y presencia di sanger.
A pesar di e hayazgonan, ningun persona a ser haya cerca di e luga y e supuesto agresor a bandona e sitio, laga e auto atras.
E caso ta bay wordo investiga pa determina e circumstancianan completo di e incidente y tuma accion adecua pa proteha e posibel victimanan di maltrato.
Polis ta pidi pa cu kende cu tin informacion relevante por comparti esaki cu nan pa yuda den e investigacion.
