Cargamento grandi di cocaina scondi den container na Aruba a wordo intercepta na Rotterdam

Otro captura haci pa HARC-Team na Hulanda

• Total di 44 kilo cocaina scondi den container
• Varios persona no-autoriza riba waf a keda deteni 

ORANJESTAD (AAN): Na waf di Aruba, ta numeroso container a wordo hisa cu e grua Gantry riba un barco pa asina e sali riba su ruta pa Europa.  Varios container ta djis bay bek Europa bashi pasobra nan a bin Aruba originalmente cu carga di producto.  Hasta containernan cu ta ser yama ‘Reefer’ (como cu nan tin aparato pa fria estilo frigidaire, of cu freezer), cu ta bay bek bashi y e aparato di fria ta paga.  Containernan di Reefer tambe tabata wordo poni riba barco pa bay bek Hulanda.

   E barco a sali rumbo pa Hulanda cu tur e containernan, y ora di yega Rotterdam e containernan bashi ta wordo baha y ultimo tempo ta e area conoci como ‘Maasvlakte’, cu ta un tereno cu nan a logra yena riba lama net pabao di e Waf.  El a bira asina un extension di e Waf y tambe un facilidad industrial.  Ora cu Waf di Rotterdam no tin suficiente espacio pa staciona containernan bashi, nan ta wordo poni riba e Maasvlakte Rotterdam aki.

   Actitud sospechoso riba tereno: Sinembargo e siman aki, oficialnan di Zeehavenpolitie na Rotterdam a bin nota un aumento inespera di hopi hende no-autoriza cu ta subi e Maasvlakte aki.  Nan a detene varios di nan, y a aresta e chauffeurnan cu a trece e hendenan no autoriza aki.  Na Hulanda a hasta crea un nomber pa e hendenan no-autoriza aki, esta “Uithalers”.

   Como cu nan a aresta asina hopi Uithalers y chauffeur cu a trece nan pafo, aki mesora “un luz” a cende cerca e personal di e asina yama HARC-Team.  Di con nan ta interesa den containernan bashi?

   HARC-Team ta un colaboracion di Douane, FIOD Hulandes, Zeehavenpolitie, y Ministerio Publico na Rotterdam.  Nan a conclui mesora di con diripiente asina hopi hende ta purba di subi Maasvlakte, esta cu lo tin mercancia di contrabando den un di e centenares di container bashi staciona eynan.

   Accion pa control: Mesora HARC-Team a mobilisa pa check ta kico e hendenan aki ta interesa pa busca den e containernan aki.  A core busca varios Douanero cu tin cacho K9 pa yuda den buskeda, y a laga un Scanner Mobil pa controla tur container move pa Maasvlakte.

   Asina un control a start riba cada container bashi, uno pa uno.  Pero ora cu a yega na un Container refrigera pero bashi procedente di Aruba, a bin nota cosnan incorecto riba e Scanner.  Ora di a bay check na e unidad di freezer cu tabata desconecta, nan a los e dos panelnan chikito pafo unda tin acceso na e evaporator blower fan, y mesora e oficialnan di Douane a haya algo eyden cu no ta pertenece.  E ora a dicidi na kita full e panel grandi pafo pa haya acceso na e evaporator coil, y asina a descubri cu tin un Tas Deportivo poni riba tanto evaporator coil #1 y tambe evaporator coil #2 di e freezer.  Den e tasnan aki tabatin varios pakete yena cu cocaina.

   Siguiendo cu e inspeccion, an a bay den e container, y na e backpanel unda e unidad di freezer ta, a usa screwdriver pa los panelnan cu tin paden, y aki no a haya mas tas, sino mas bien algun paki extra los scondi.

   Net 44 kilo: Den e seccion di evaporator coil di e freezer tabatin pues 2 tas, cu hunto 33 paki di cocaina.  Den e panel paden a bin haya 11 paki mas.  Cada paki tabatin emblema di “NBA Neuchatel Basket Association”.  Esaki ta un forma cu cartelnan di droga ta identifica nan producto.

   Ora cu HARC-Team a bay pisa e 44 paki di droga, nan a yega na 44 kilo di cocaina.  Tur esaki a wordo confisca, y riba caya esaki tin un balor di casi 3,5 miyon Euro.  Mientras tanto e droga a wordo destrui inmediatamente.

   Pero awor ta investigando tur e personanan ‘Uithalers’ deteni na Hulanda, incluyendo nan chauffeur cu a keda warda nan pafo di Maasvlakte.  Tambe a manda informacion extenso pa oficialnan di Aruba pa yuda cu investigacion aki.