Baby Januell a hoga den piscina riba Bierna Santo

Famia den panico y inconsolable

• Famia na Sabana Basora a hay’e den piscina
• Tanto Polis y Paramediconan a duna CPR 

ORANJESTAD (AAN): Panico y susto enorme ta loke famianan a pasa aden na Sabana Basora 157 riba Bierna Santo, ora cu diripiente nan a bin haya un criatura di 21 luna den un piscina construi den forma di letter L den cura di cas.

   Sin pensa dos biaha a bula den e piscina y a saca e baby cu no tabata reacciona.  Famianan gritando di spanto, y pidiendo auxilio pa duna yudanza pa rescata e baby aki, a hala atencion hasta di bisiñanan. E momentonan ey cielo tabata basta scur cu nubianan cu a basha awa den varios area di e isla e Diabierna atardi ey.

   Danki na e gritonan aki, yamadanan di urgencia a cuminza drenta na Polis alrededor di 2:00 pm di e caso aki.  Inmediatamente Centro di Alarma tambe a wordo informa, y e prome unidad di Polis di San Nicolas a cuminza mobiliza pa e adres.  Otro unidadnan policial den e area, incluyendo unidadnan di Polis K9 tambe a acudi eynan pa duna un man.

   Cuminza duna CPR: E prome unidad di Polis cu a yega, a stop y agentenan a core bay paden.  Aki a topa famia cu e mucha sin cu e ta mustra señal vital.  Polis a ripara cu e no ta reacciona na nada, y a tume over y cuminza practica CPR riba dje eynan mes pa asina purba na pone e curazon bati bek, y sperando yegada di Ambulans.

   E mama hoben hunto cu welanan y demas famia tabata den panico y tabatin tur nan speranza riba e yudanza di Polis pa practica CPR riba e mucha homber chikito aki.  E otro agente tabata suministra Central riba e situacion y keda pidi presencia urgente di Ambulans.

   Na momento cu Ambulans a yega, e paramediconan a tuma over e proceso di CPR y a sigui cu esaki.  Pero ora di pone aparato di monitor curazon, a bin nota cu nada di esaki no tabata yuda mas.  Nada di señal vital, pues e mucha lo tabata basta rato den awa caba y a stop di hala rosea y curazon a para.

   Famia tabata inconsolable: Paramediconan a informa Polis cu nan no por haci nada mas, y a pidi Centro di Alarma pa yama un Docter pa bin na e cas.  Nan a cubri e baby parcialmente cu paña sperando yegada di Docter.

   Polisnan na nan turno a manda yama tur autoridad concerni, y tambe a pidi presencia di Bureau Slachtofferhulp pa asina yuda cu e famia desespera aki y den nan dolor profundo.  E extra dolor ta cu e caso tragico aki ta socede net riba e fecha di natalicio di e wela di baby cu ta biba na e cas aki.

   Cada rato mas famia tabata yegando, y asina hunto tabata trata na consola otro y expresa palabranan pa trata na trankiliza e famia.  Pero e tabata un momento tristo pa tur hende, y no tabatin ningun hende eynan cu no a haya lagrima den nan wowo.

    Finalmente Docter a yega na e cas, y pa 3:10 pm, Dr. Texier a constata morto di e baby Januell R.G., naci dia 1 Juli 2021 na Aruba.  E criatura aki cu a conkista curazon di tur miembro di famia, tabata falta apenas 85 dia pa el a cumpli su di 2 aña.

   Autoridadnan a papia cu tur miembro di famia na e cas aki, unda tin un Spa tambe ta operando, pa determina si ta un accident a socede of algo otro.  Oficialnan hudicial forensico di BFTO tambe a presenta pa documenta tur esaki.  Sinembargo Vocero Policial no a menciona nada otro, pues ta asumi ta un incidente tragico a socede aki.

   E tristeza grandi den famia aki, ta e motibo cu e unidad di Ambulans a keda un tiki mas, por si acaso cualkier hende den famia bira malo debi na e situacion inespera aki.

   DIARIO como tambe Cuerpo Policial, Servicio di Ambulans, ta manda palabranan di profundo condolencia na famia, y ta desea mayornan y famia hopi forza pa e dianan venidero.'