Scondi bao santo blanco
ORANJESTAD (AAN): Ultimo seis lunanan, na peninsula di Paraguana na pais bisiña Venezuela, militarnan ta move cu hopi personal a lo largo di beach y canto di lama, cada uno cu pida tubo den man, ta pasa y pusha e tubonan aki den santo. Danki na esaki, ultimo temponan nan a logra di captura un monton di bulto, yena cu paki di droga scondi bao di tera.
Narcotraficantenan ultimo tempo sa cu ta cierto cantidad di droga so por subi un boto pa asina e wordo transporta pa otro pais. E resto ta keda scondi, door di dera esakinan bao tera. Si pa malasuerte e traficantenan aki wordo deteni of nan perde nan bida durante nan cruzamento riba lama... ta eybao e paki di droga ta keda dera tambe.
Awor ta sali na cla, cu esaki ta e modus operandi tambe na Aruba! Tur esaki a bira conoci Diadomingo, ora un campista na beach di Grapefield na San Nicolas a dicidi na cuminza coba algun buraco pa asina pone staca cu ta wanta un tent cu e ta hisando.
No ta conoci si apenas Diadomingo el a cuminza campa, of a djis hala un tent pa un otro lugar. Sinembargo ora di coba pa pone e staca, aki el a bin dal di obheto raro bao di santo blanco.
Ora di a bay coba mas amplio rond di e obheto, a bin nota cu ta trata aki di pakinan di droga! Mesora a pone Polis na altura.
Central di Polis a manda autoridadnan di Unidad di Crimen Organiza (UGC) como tambe unidad di Polisnan K-9 na e lugar.
Enberdad a bin nota cu ta trata aki di droga. Polis a saca e pakinan y a check e area eybanda. Nan a nota nomber di e persona cu tabata lantando su tent, y a marca tambe unda exactamente e paki di droga aki a wordo haya.
Vocero di Polis Lito Lacle, a confirma cu e pakinan aki a wordo confisca. E no a bisa si ta trata aki di marihuana of cocaina, sinembargo tur cos ta mustra cu ta e puiro blanco comprimi tin den nan.
Polis ta bay compara e forma di paki, y e ‘emblema’ riba nan cu demas casonan cu a keda registra den pasado, pa asina haya un idea ta cuanto tempo nan tin warda eybao.
Sea e droga ta fresco, pasobra ta warda momento oportuno pa sak’e di eybao. Of kizas e persona na kende e droga ta pertenece, lo a lubida full riba dje.
