Auto a zwaai y saca tur dos ocupante y benta nan riba caminda

Un biaha mas dalmento pisa na Camacuri

• Tres persona a keda gravemente herida 

ORANJESTAD (AAN): Diasabra marduga banda di 2:00 am, Central di Polis a wordo alerta door di Centro di Alarma, cu un unidad di Ambulans a bin topa cu un accidente basta pisa atrobe riba caminda principal di Aeropuerto pa Playa, na altura di oficina principal di Aruba Bank.

   E area di Camacuri aki, un biaha mas a bira scenario di un accidente di trafico serio. Dos auto sedan a dal frontal, net altura unda algun siman atras auto a dal un peaton mata.  Personal di Ambulans a notifica Centro di Alarma, cu nan ta mira 4 persona herida den e accident, di cual tres ta hopi serio.

   Mesora Central di Polis a cuminsa manda unidadnan di Polis pa cera e caminda, y tambe bay controla e situacion.  Centro di Alarma na su turno a manda mas unidad di Ambulans, y tambe a saca Vehiculo di Rescate y un Spuitwagen pa bay duna un man.

   Polis a yega y bin topa un auto Nissan Tiida color blanco cu number A-11944 benta banda panort di caminda, den e uitrit for di Aruba Bank.   Pazuid di dje, na otro banda di caminda a haya un Hyundai Accent color scur cu number A-64986.  Tur dos vehiculo cu extremo daño material na e parti dilanti.

   Polis a mira cu dos persona cu hopi golpi na curpa y herida na nan man, tabata benta abao banda di e Nissan Tiida. Riba e caminda, tur cos di e auto a keda gespat.

   Testigo a declara: Tabatin un testigo cu a bisa Polis cu el a mira e accident socede.  El a conta agentenan, cu e Nissan Tiida blanco tabata bin di Aeropuerto bayendo pabao y e Hyundai Accent tabata bin di Rotonde Las Americas y ta bayendo pariba cu velocidad halto y tabata pasando auto. Momento e lo a mira e Tiida y a bay purba drenta back, pero ya tabata laat.

   Testigo a bisa cu e dalmento a produci un sonido duro.

   Ocupantenan di e Hyundai Accent den e choke duro, caminda auto a ‘zwaai rond’ y bay finaliza pazuid di caminda.  Pero den e zwaaimento aki, nan a worde saca di e auto violentamente (un indicacion cu nan no tabatin seatbelt bisti), y nan (un homber y un muher) a bay finalisa abao cerca di e otro auto, esta e Nissan Tiida.  E dos persona cu tabata den e Tiida si a keda den nan auto, kizas nan tabatin seatbelt.  Toch a haya golpi debi na e choke cu ta parce di ta frontal.

   E homber a sufri di fractura complica na un di su pianan, mirando e posicion cu su pia a keda aden.  Fuera a ricibi multiple trauma, cu a haya no djis durante e choke, pero tambe ora cu nan a wordo gezwaai y cay duro abao riba caminda.  E muher tambe a haya basta golpi na su curpa.

   cabayero a sufri trauma serio na un di su piana, mirando e posicion cu e pia tabata y sin conta mas golpinan. Por a mira e dama tambe a haya hopi golpi.

   Por a mira con bateria di e Hyundai Accent a wordo gezwaai y bay cay te unda hende ta cana ariba e pad di Linear Park.

   Paramediconan a traha duro pa asina stabiliza e dos victimanan cu a wordo haya benta abao, pa asina bay cu nan prome rumbo pa Hospital.  Despues a bay cu esnan di e Nissan Tiida.

   E golpi fuerte a laga caminda basta sushi cu no djis azeta, sino tur otro di fluid, y coolant cu a basha di e autonan.  Personal di DOW mester a wordo manda pa asina basha santo riba caminda.