Auto a bolter y bay finaliza den cura di hotel lagando desaster atras

Tres persona herida

• Resultado claro di exceso di velocidad 

ORANJESTAD (AAN): Diadomingo pa mas o menos 6:30 pm, Central di Polis a manda unidadnan di Polis di Noord y tambe Strandpolitie cu urgencia pa Avenida Nelson Oduber, como cu un auto a bolter, bay halto y cay den cura di The Ritz-Carlton.

   Basa riba cantidad di yamada, a pone Ambulance como tambe Vehiculo di Rescate di Cuerpo di Bombero sali rumbo pa eynan.  Hendenan ta indica cu e personanan a keda pega den e auto sedan Mitsubishi.

   Polis a mira mesora cu e auto aki tabata coriendo di Malmok bayendo Palm Beach, y caba di pasa banda di e T-weg pa bay Fisherman’s Huts, posiblemente debi na velocidad halto net aki unda e caminda tin un birada pa man robez, e auto aki lo a sigui baha na man drechi, dal fuertemente den un palo di luz, bay den un scual, unda el a dal y bay halto na e cura di hero cu tin rond di Ritz-Carlton.

   E vehiculo a keda draai rond den halto y bay y dal un palo di luz di parkinglot, y finaliza riba un auto staciona.  Den e parkinglot un total di 4 auto staciona a ricibi daño material extenso.  Testigonan a bisa cu un mucha chikito den e auto a wordo saca violentamente y a cay pafo dal su curpa contra un auto staciona.

   Den e auto tabatin un señora y dos mucha.  Debi na e spanto nan a cuminza grita, como cu nan no por a sali di e auto.

   Polisnan a yega cu mas unidad, pa asina cera e caminda for di entrada di The Ritz-Carlton te na e T-weg pa bay Fisherman’s Huts.

   Ambulance y Rapid Responder tambe a yega, hunto cu Vehiculo di Rescate y un Truck di Spuit.  Nan a logra stabiliza e auto pa asina e no move, como cu el a keda di banda (gekenter) riba e parkinglot.

   Finalmente tur herido a wordo saca y atendi pa personal di Ambulance.  Despues nan tur a wordo hiba rumbo pa Servicio di Emergencia na Hospital.

   Esaki ta di dos biaha cu auto ta perde control y termina riba parkeerplaats kibrando e cura di e Resort.