Reto di TikTok yama ‘Ding Dong Ditch’
ORANJESTAD (AAN): Tabata Dialuna anochi laat pa 11:45 pm, cu un unidad di Polis a bay rumbo pa un cas na Savaneta pa check caso sospechoso. Na e cas a papia cu e habitante di inicial W., kende a relata cu un rato prome tabatin tres mucha homber para riba caya dilanti su cas, cu muts y capuchon riba cabes. E habitante mes tabata scondi ta mira con e muchanan diripiente a yega mas cerca di su cas, y diripiente uno di nan a drenta su cura, y cana rumbo pa e porta principal.
Aki ta unda cu e habitante W. a aparece riba e hobennan, y el a reconoce uno di nan. E muchanan a rek careda core bay. E habitante W. a informa Polis cu e sa unda dos di e muchanan aki ta biba. Polis a bay na e cas ey na Savaneta hunto cu habitante W.
Na e cas, un señora a bin pafo pa papia cu Polis. El a bisa cu e ta mama di e dos muchanan. Polis a pidi e señora pa e yama su dos yiunan pa papia cu nan. Ora cu nan a sali, e habitante W. a reconoce esun cu tabata dilanti su cas. Despues di a puntra e muchanan kico nan ta haci riba caya dilanti e cas, nan a bisa cu ta e TikTok Challenge, esta e wega di ‘Ding Dong Ditch’ nan tabata haciendo.
Esey ta un wega peligroso, pasobra riba Social Media por mira con varios di e wega ey di ‘primi bel di cas’ y core bay a sali e hobennan malo ora cu nan a topa cu habitantenan cu a defende nan cas fervientemente.
Na Aruba bon mes cu e hobennan no a pasa den nada malo, pero toch Polis a duna nan un scual fuerte riba nan comportacion asina laat riba caya. Na final a notifica Central di Polis tambe di e asunto.
