- Turistanan menasa cu ijspiek
- Dos atracador di cual uno ta color scur
ORANJESTAD (AAN): Diferente unidad di Polis a mobilisa Diaranson anochi cu urgencia den area di Hotel Zone, specificamente den e area cu tin riba caminda di Irausquin Boulevard, riba e pasiyo largo cu tin dilanti Barcelo Aruba Resort, Hyatt Regency Resort, y Playa Linda Beach Resort.
Banda di 9:15 pm, unidad di Polis di Noord a wordo manda den e area cerca di e parkinglot grandi di Hyatt Regency, como cu eybanda un pareha turista a wordo atraca.
Ora cu Polis a yega eybanda, a resulta cu e ta un tiki mas panort, cerca di e zona di Dunkin’ Donuts net otro banda di Playa Linda Beach Resort.
Polis a papia cu e pareha, kendenan ta turistanan procedente di Mexico. Pero aparentemente pa un of otro motibo, nan no a bati alarma mesora. Despues a bin haya sa cu e atraco aki a socede como 90 minuut prome. Pues ya caba 1 ora y mey a pasa.
Menaza cu ijspiek: E pareha Mexicano a relata na agentenan policial, cu un rato prome dos homber a atraca nan usando un ijspiek (‘icepick’) cu ta un obheto skerpi pa kibra y separa ijs.
Nan a bisa cu un di e hombernan tabata bisti cu flanel blanco y carson preto y tabatin cuero color scur. E otro homber nan no por a wak bon. E hombernan a exigi pa nan duna tur nan pertenencia.
E victimanan a duna Polis un splicacion detaya di tur loke e dos atracadornan a bay cu ne. Nan a bay cu e yabi di nan auto di huur, tambe un cartera conteniendo placa Dollars cash, tambe Pesos Mexicano, credit card y tambe debit card, y algun cos mas.
Despues di esey, e dos hombernan a huy na pia direccion zuid.
Varios unidad di Polis a keda core rond pa check hende cu por ta cuadra cu e descripcion. Mientras tanto Departamento di Atraco Team a presenta na e lugar pa asina haci nan investigacion. Tambe Bureau Slachtofferhulp a presenta pa duna asistencia na e turistanan.
Polisnan a bay check areanan unda atracadornan den pasado a usa pa huy of sconde, pero sin resultado.
Atraco Team lo bay check e area unda e caso a socede, pa mira si tin Security Camera instala. Algun di e Hotelnan aki tin sistema avanza di Security Camera cu lo por a capta esaki.
Ademas di esaki, vocero policial Liliana Rasmijn ta suplica cualkier hende cu tin detaye di e caso aki, pa yama Tipline di Polis na 111-41 y duna informacion di esaki. Corda cu bo por keda anonimo.
