Accion di autoridad riba crimen
- Razzia na Ranchostraat tambe a produci 3 detencion
- Muher di edad grandi tambe a keda deteni
ORANJESTAD (AAN): E investigacion di e oficialnan hudicial encarga cu investigacion di e baho mundo di droga, ta sigui su curso na Aruba. Esaki semper ta danki na tip valioso cu autoridad ta ricibi di pueblo, pero tambe danki na detencion cu ta haci di varios dealer chikito di droga, kendenan ta core “papia y basha abao”, y asina ta haya sa unda e big fish por ta scondi.
A base di recien investigacion, cu detayenan ampliamente splica, y obteni cu tur acceso hudicial, a presenta tur esaki na Ministerio Publico. Despues di revisa esaki, Fiscal ta duna OK pa asina por bay tene un razzia na adresnan di interes.
Esaki a wordo planea y no a socede den oranan di marduga ni mainta, pero mas bien atardi! Pues e fecha di 21 di Mei 2024 den oranan di atardi, e team di Unit Narcotica cu sosten y apoyo di Team di Aresto, Flex Team, unidad K-9, y tambe Ministerio Publcio a haci diferente entrada hudicial y a pasa pa detene diferente sospechoso cu ta wordo busca.
E accion a cuminsa prome na un adres na Ranchostraat na Playa. Despues di esey, e team a mobilisa pa un adres na Sero Patrishi.
Den un forma bon calcula y cu tactica, e oficialnan hudicial a yega cu rapidez na e prome cas na Ranchostraat. A cera cranchi pa evita cu nan por flush WC y deshaci di prueba. Den e accion aki, Unit Narcotica a confronta y detene dos homber y un hende muher.
Vocero Policial a confirma na DIARIO, cu ta trata di e homber R.D.C.M. 26 aña, e homber S.I.W.S. di 23 aña y e muher A.A.T. di 65 aña. Hopi notabel cu ta gara hende di edad grandi asina meti den asunto.
Vocero a confirma cu na e cas aki den Ranchostraat, autoridad a confisca un auto, dos brommer y droga. No a menciona ki tipo di droga a wordo confisca.
Despues e team di Unit Narcotica a presenta na un cas den Sero Patrishi. Eynan a haci un entrada hudicial y durante ristamento a bin topa cu arma di candela, y tambe a haya municion y droga. Aki tampoco no a describi ki tipo di droga.
E hecho cu a haya arma di candela, ta mustra con un comunidad tin rason pa ta intrankil, como cu bo no sa si e casnan banda di bo tin hende cu arma di candela den e hogar of no.
Tur e accion aki merece un aplauso di comunidad. E ta demostra tambe cu Unit Narcotica ta trahando incansablemente pa asina combati e bendemento di droga diariamente. Pabien tambe na Cuerpo Policial completo.
