Accidente pisa na Tanki Leendert a cobra bida di Brian Hassell

Impacto tabata semi-frontal

• Su auto a keda totalmente destrui door di impacto
• El a bira e di 10 morto den Trafico pa 2022

ORANJESTAD (AAN): E impacto a sona masha duro mes!  E soño di varios habitante a wordo interumpi Diasabra marduga poco prome cu 2:15 am, riba caminda di Kibaima pa Pos Abao, na altura di Tanki Leendert poco pabao di e cruzada cerca di Kapel Huan Pablo II.

   Tur cos ta mustra cu un Toyota Starlet color cora cu number A-70492 tabata bahando di pariba rumbo pabao pa Tanki Flip, y na altura di e Kapel a cuminza hala na su man robez caba pa bay pasa e auto cu tin su dilanti.

   Esaki ta net e caminda cu asina cu bo pasa e cruzada pa bay Modanza y/of tambe Colegio Ora Ubao, e ta haya un birada pa drenta Tanki Flip.

   Net e momento ey un Mitsubishi Lancer color preto cu number A-18711 tambe ta bin for di direccion contrario.  Siendo cu ainda e Toyota Starlet tabata haciendo su maniobra di pasa e auto net den e birada peligroso aki.

   Ta parce cu e chauffeur di e Toyota Starlet a dicidi na baha banda robez di caminda pa evita di dal den e auto cu ta yegando rapidamente di direccion contrario.  Pero e lo a haci un mal calculo, of e otro chauffeur tambe pa casualidad a hala na banda pa evita un choke.

   Dal otro semi-frontal: Resultado ta cu nan a dal semi-frontal den otro, net dilanti e Kiosco di Lotto di “Manton Lottery 4” cu ta keda banda zuid di caminda net na Tanki Leendert 285-C.  E sonido a sona masha duro mes, manera un explosion.

   Debi na e dalmento y e momentum di movimento, y e hecho cu full e wiel banda dilanti na man drechi a kita, e Mitsubishi Lancer a bay den un scual di 360 grado, por poco dal den un otro auto, y finaliza 30 meter mas pariba na su banda di caminda.  Full e parti drechi dilanti a keda destrui, cu windshield kibra.  Den e Lancer tabatin solamente e chauffeur.

   E mesun momento ey, e Toyota Starlet a ricibi un impacto mahos cu a kibra full e chassis banda drechi dilanti, a kibra tur engine support, pusha e dashboard bay full paden, y e vehiculo aki su parti robez a bay halto, hala mas na banda pazuid di e caminda, y finaliza dilanti cura di cas Tanki Leendert 287-A cu ta como 36 meter leu di e zona di impacto.

   Como cu engine support a kibra, asisti pa e momentum di movimento y impacto, e motor di e Toyota Starlet a wordo ‘catapulta’ for di e auto, keda zwaai su so te finaliza como 75 meter mas leu di e zona di prome impacto.   El a finaliza mey-mey di caminda, net dilanti e portanan di ex-OK Supermarket.  E prome autonan cu a pasa eynan no a ripara cu e motor ta mey-mey caminda y a plama tur su motor oil, y pesey e caminda a keda mancha despues cu rasto di wiel di autonan cu a yega despues.

    Prome hendenan cu a yega: Mientras tanto mesora yamadanan a cuminza drenta na Central di Polis.  E prome a drenta pa 2:16 am, segun vocero policial Lito Lacle a confirma.  E prome yamada ta mustra cu e accident ta uno pisa.  Inmediatamente patruyanan di Noord y tambe Oranjestad a mobiliza pa e area pa bay duna un man.

    Pero mientras cu Polis como tambe Ambulans ta yegando na e lugar, amigonan di e chauffeur di e Toyota Starlet a bin haye den un situacion precario, unda cu dificultad e tabata hala rosea.  E zona di impacto a bay dal e duro na henter su curpa, incluyendo e stuurwiel cu a keda full dobla.

   E amigonan a ripara e seriedad, y nan a dicidi cu nan ta bay hibe cu nan mesun auto rumbo pa Servicio di Emergencia na Dr. Horacio Oduber Hospital.  Pasobra aki ta cada minuut ta conta.  El a yega Hospital cu bida, y mesora personal di Servicio di Emergencia a cuminza traha riba dje pa trata na stabiliza su pulso, su rosea, y e signonan vital.

   Un accident grave: Mientras tanto ora cu Polis a yega, nan a bin haya un zona grandi di accident nan dilanti.  For di unda e Mitsubishi Lancer a para, te na e motor di e Toyota Starlet, e tabata un distancia di 110 meter.  E area a keda full yen di glas kibra, pieza di motor gespat tur caminda, hasta un boter grandi di gas Freon a bula sali for di e Toyota Starlet y keda benta abao.  Polisnan mesora a cera e caminda banda di Snacktruck di cuminda Hulandes, y banda pariba a cera e caminda na e cruzada pa bay Scolnan Basico y Preparatorio.

   Ora cu a bay mira e Toyota Starlet, e destruccion di e vehiculo a mustra cu esaki enberdad ta un accident grave.  Pero testigonan eybanda a bisa Polis, cu ya caba algun hende mes a core hiba e herido cu urgencia pa Hospital.  Mesora a notifica Central di esey, y un unidad di Polis a wordo manda pa Servicio di Emergencia pa check ki dato por haya.   Personal medico na Servicio di Emergencia a traha bastante pa asina trata na stabiliza e victima, cu tabatin multiple trauma na su curpa y cabez.  E tabata un lucha di como 30 pa 35 minuut largo.  Sinembargo pa 3:02 am, Docter Duijzer a constata morto di e chauffeur George Brian Hassell di 29 aña di edad, naci na Aruba.  E ta mihor conoci como ‘Brian’ y tambe ‘Joshi’, y ta un persona cu regularmente ta envolvi den competencianan na Palo Marga den mundo di motorsport.

   Busca expertonan: Mientras tanto, Polisnan na Tanki Leendert a manda pidi presencia di Polis di Trafico, y tambe oficialnan forensico di BFTO pa bin documenta e accident aki.  E tabata un trabao largo cu a dura hasta te ora cu solo a sali.  A tuma nota di tur cos, incluyendo e hecho cu e motor cu a keda benta riba caminda tin un turbocharger instala riba dje.

   A pone Ministerio Publico tambe na altura di loke a socede, y pa 3:20 am, Fiscal a tuma decision cu ta confisca e curpa.  Esaki muy probablemente ta pa practica autopsia pa haya sa e causa exacto di morto, y tambe pa haci test toxicologo riba dje, pa mira si acaso e tabatin alcohol of otro substancia den su curpa.

   Vocero Policial Lito Lacle, a indica cu Brian Hassell a bira e di 10 morto den Trafico pa 2022 na Aruba.

   Su amigonan conoce como Joshi, y nan a keda hopi desanima cu su fayecimento.  Diasabra mainta mes por a mira algun amigo cu a reuni na e zona di impacto, pa asina reflexiona riba su bida y su nificacion pa nan amistad.  Hopi ta considera Brian como un persona di bon curazon, di bon humor, y na su trabaonan e tabata wordo mira como un persona valioso, balente, experto den service airco, y sigur cariñoso pa tin contacto cune.

   E ta ademas un ferviente fanatico di vehiculonan di marca Toyota, y ta usa nan pa su caredanan di Streetlegal na Palo Marga.  E auto mes cu el a haya accident cune, esta Toyota Starlet, ta un vehiculo cu e compania Japones a stop di fabrica na aña 1999.  Di e tempo ey, esta 23 aña pasa, e modelo ‘Starlet’ no a wordo traha mas.

   Na Hospital, Polis a manda busca personal di Bureau Slachtofferhulp pa asina yuda cu e famia tambe.  Riba e potret por mira con e motor a keda atras benta riba caminda, y grupo di amigonan tristo cu a aglomera mainta na lugar di accident.  Brian a bay laga su pareha, y tambe un yiu chikito atras.

   Na famianan di e fayecido, DIARIO y tambe Cuerpo Policial ta extende su mas profundo palabra di condolencia.