Detencion durante razzia na Pos Chikito
ORANJESTAD (AAN): Cu yudanza di tip, observacion di security video camera, y di bon trabao di detective, oficialnan di Atraco Team a haci un trabao sublime pa asina core tras di rastro y alavez haya extra informacion di un grupo local hoben cu a comete algun atraco recientemente riba e isla.
Pesey mes semper ta bon pa cualkier hende cu a ripara algo raro, sea prome of despues di un atraco, pa duna tip na Polis. Corda cu Polis ta garantiza cu bo tip na Tipline di 111-41 ta bay keda anonimo.
E ultimo pista cu nan tabatin riba un caso nobo, a base di tur prueba obteni, a dicidi na trece tur esaki na Fiscal pa asina Ministerio Publico dicidi si ta bay actua of no. Asina a tuma decision, cu ta bay prepara pa tene un razzia riba Diasabra marduga.
Atraco Team a prepara tur cos, y cu yudanza di otro oficialnan di Recherche, di funcionarionan di Polis, unidad K9, y tambe Team di Aresto encarga pa realiza detencionnan peligroso, a sali marduga rumbo pa e adres na Pos Chikito 117. Esaki ta un cas cu ta keda como 150 meter pariba di veld di SV Unistars, net na rand cu Rooi Lamunchi.
Como cu tin indicacion cu e hendenan aki lo por tin arma potente den nan poder, a haci e razzia aki na e forma mas sorprendente cu por pa e habitantenan di un Apartamento na e cas.
Polisnan a yega den forma di sorpresa, y a drenta rapidamente y mesora a domina y aresta un pareha cu ta biba den e Apartamento.
Vocero di Polis Lito Lacle, a confirma cu durante e razzia a detene e homber hoben di inicial A.M.B. di 25 aña naci na Aruba, y tambe e muher hoben L.I.A.P. di 23 aña tambe naci na Aruba.
E pareha aki ta wordo sospecha cu nan a bay riba un racha di atraco rond di e isla, pero esey no ta tur! Nan tambe ta envolvi den kiebro cometi den diferente negoshi na Aruba.
Durante e entrada hudicial aki, a revisa tur rond riba tereno di e cas, y tambe a listra den un Suzuki Swift cu ta staciona net na e entrada paden di tereno.
Durante e razzia, oficialnan hudicial a descubri y confisca un revolver, diferente atributo y material cu nan a usa pa comete e crimennan, y tambe a haya equipo cu nan tabata usa pa comunica cu otro durante e atraco. Pues un pareha criminal cu ta up-to-date cu tecnologia pa comete nan fechoria.
Nan a wordo deteni, y Fiscal a duna ordo pa nan wordo encarcela mesora pa mas investigacion. Sigur un gran logro di autoridadnan hudicial di Aruba pa yuda soluciona algun caso asina rapido y recto.
Toch keto bay, pa Cuerpo Policial por resolve mas caso, ta hopi importante pa por conta riba cooperacion di pueblo. Pesey ta pidi si bo tin cualkier informacion, pa yama na e tipline di 111-41. Tur informacion ta keda confidencial.
