Accidente na Coba Lodo a laga dos persona herida

ORANJESTAD (AAN):   Un incidente a sosode Diadomingo marduga pa mas o menos 1'or y mey. 

Polis di Santa Cruz a wordo yama pa bay direccion Coba Lodo. Eynan a sosode un accidente y tabatin hende herida.

            Patruya a yega na e sitio y e agentenan a topa cu un Kia flatbed pega contra un palo di luz, parti pabou di caminda.

            Nan a constata cu den e auto tabata tin un meneer y un dama hoben. Ambos a ricibi golpinan fuerte na cabes.

            No tabata tin mucho informacion riba kico a sosode pero locual si por mira ta cu e chauffeur a kita bay completamente na su man robes y dal contra un palo di luz.

            Pa atende cu e accidente, Ambulance a presenta y a duna atencion na e victimanan. Despues a sali bay direccion Hospitaal. 

            Pa loke ta e dañonan, compania di seguro y Elmar a wordo avisa di e incidente.