Bon coordinacion entre Polis y Wardacosta
- Tur tres venezolano abordo ta deteni
- Droga ya caba a worde destrui
ORANJESTAD (AAN): Den e anochi di Diasabra pa Diadomingo, mientras cu comunidad ta gozando di ultimo weekend di vakantie, cu actividadnan na diferente lugar... a sali na cla cu narcotraficantenan tabatin plan pa usa e Diasabra anochi aki pa nan cruza lama Caribe pa asina efectua dropping di droga na Aruba.
E bon noticia ta cu na Aruba, tin oficialnan vigilante trahando cu atencion completo den Sala di Radar cu Cuerpo Policial tin instala. Esaki ta usa radarnan maritimo pa asina detecta movimentonan cu no ta usual.
Diadomingo marduga, nan a detecta un obheto riba Radar cu ta moviendo cu velocidad basta rapido rumbo pa Aruba. A cuminza vigila e movimento, y a cuminza plot e ruta cu muy probablemente e lo bay tuma. Di e forma ey a cuminza informa Polis Maritimo, tambe Helicopter di Polis, y claro a notifica Centro MOC di Wardacosta di Caribe Hulandes pa nan ta na altura di e movimento di boto.
Autoridadnan a subi lama y cuminza bay den direccion di e boto. A bin nota cu ta trata aki di un Speedboat cu diripiente a dal un buelta di 180 grado, y a cuminza bay bek direccion zuid. Helicopter di Polis tambe a lanta vuelo pa bay tira un bista.
Wardacosta sinembargo a logra gara nan prome cu nan a drenta bek awa teritorial Venezolano. Abordo a bin haya 3 miembro di tripulacion, y un cargamento basta grandi di droga.
Nan a ser lastra bek pa Aruba, unda a drenta na Pier di Wardacosta. E capitan y e dos tripulantenan a wordo pasa pa Departamento di UGC di Cuerpo Policial pa sigui cu e investigacion, pa purba haya sa ki tipo di droga e ta, di ki area e ta bin, y pa haya sa pa kende e ta destina.
E speranza ta cu awe Dialuna, sea Polis di Aruba, of Wardacosta di Caribe Hulandes lo bay suministra informacion na pueblo pa sa cuanto e peso total ta di e droga cu a wordo confisca, y tambe kico mas por a haya abordo di e speedboat, e.o. GPS, Satellite Phone, of Arma di Candela.
Segun e regla nobo cu paisnan Hulandes den Caribe ta sigui awor, ta cu e droga ta wordo destrui mesora despues cu nan documenta y pisa tur e mercancia.
