A detene 4 persona y confisca cantidad grandi di droga na Boca di Bolonfa

ORANJESTAD (AAN):   Cuerpo di Polis a informa cu pa 6.50 pm melding na drenta via Central di Polis cu na Boca di Bolonfa tabata mirando hendenan ta canando.

            Mesora a manda unidadnan di Santa Cruz, Kustsurveillance y coleganan di Guarda Nos Costa na e sitio.

            Aki despues di oranan buscando a detene 4 homber di cual nan identidad te aworaki no ta conoci. Tambe a confisca 5 drum di plastic cu un gran cantidad di pakinan cu probablemente lo ta droga.

            E 4 sospechosonan a wordo tuma over pa e Unidad Di Crimen Organisa di Cuerpo Policial cu lo sigui cu e investigacion.

            Pa Cuerpo Policial por resolve mas caso cooperacion y informacion di pueblo di Aruba ta hopi importante, pesey ta pidi si bo tin cualkier informacion yama tiplijn: 11141. KPA ta garantisa cu bo ta keda anonimo.