ORANJESTAD (AAN): Ta parce cu no tin ningun reduccion den e cantidad di movimento riba lama, sea pa transporta hende of droga.
No ta djis Guardacosta ta cuida costa di Aruba, pero Cuerpo Policial di e isla tambe ta keda cu wowo bon habri pa vigila tur movimento.
Diamars anochi banda di 8:20 pm, e funcionarionan cu ta vigila tur movimento den Radarroom di Cuerpo Policial, a mira un ‘bleep’ riba e pantaya den area algun miya pazuid di Rodger’s Beach. Esey ta cu e marineradar a detecta e boto cu a drenta den un forma ilegal for di Venezuela den awanan teritorial di Aruba.
Den cuadro di bon cooperacion entre Radarroom di Cuerpo Policial, Polis Maritimo, y Helicopter di Polis, nan tur a uni pa asina sali y busca forma pa intercepta e boto aki.
Cu yudanza di e tracking di e boto via radar, e oficialnan di Polis riba caya a sa di dirigi nan mes na e area, y a detecta e boto. Di e forma ey a persigui y obliga nan di stop. E ta un boto tipo peñero cu tabatin 24 persona indocumenta abordo.
Bao di vigilancia di Polis Maritimo, y tambe e Helicopter di Polis for di halto, nan a dicidi na trece e boto pa costa di Aruba. Esaki a dura un poco, como cu e boto tin solamente 1 Outboard Engine di marca Yamaha.
A trece e peñero na Waf di Barcadera, unda demas instancia e.o. di Guarda Nos Costa, Douane, y Polisnan Uniforma tabata wardando riba nan.
Autoridadnan a detene e Capitan, y tur tripulante tambe. A pasa nan pa Recherchenan di Unidad cu ta atende traficacion di hende. Nan ta mira e caso aki como uno di categoria di mensenhandel y tambe mensensmokkel, y pesey ta bay interoga cada uno pa asina investiga e sucedido.
A bin haya sa, cu e peñero aki a zarpa for di Peninsula di Paraguana rumbo pa Aruba, cu 20 homber abordo, y 4 muher.
Na comienzo di siman, un boto cu algun ilegal a logra yega na Dos Playa den Parke Arikok y tur hende a logra subi tera y ‘plama’ y desaparece den comunidad.
