Abogado mr. mr. Kip den Corte
ORANJESTAD (AAN): Diabierna mainta tabatin un interesante caso den Corte caminda un hoben di 19 aña a tira un hoben kende hunto cu un otro a atak’e y ranca un cadena bay cun’e.
Durante tratamento di e caso a bin resulta cu e hoben L.L. tabata victima di bullying (termento) constante y dos biaha a worde atraca y cadena ranca for di su garganta. El a dicidi di fia un arma pa defende su mes y a hay’e ta tira.
Fiscal, teniendo cuenta cu e circumstancia a exigi 4 aña di prison. Abogado mr. Kip ta haya cu L.L. tabata un victima di bullying di e gang di Village y na dado momento den su desesperacion ora el a worde ataca e no tabata por mas.
Den e articulo aki, DIARIO ta concentra riba e defensa di mr. Kip. Den un otro articulo ta publica e tratamento di e caso y e punto di bista di Fiscal.
Actitud preocupante di hobennan: Abogado mr. Kip a bisa Hues cu e ta sinti cu L.L. no ta conciente cu detayes riba e caso ta importante. El a mustra cu Polis mes ta mustra den e procesverbaal cu e victima N.B. mes no ta papia e berdad y no kier coopera cu e investigacion.
El a mustra cu ta hopi tristo loke a sosode caminda ta mira e comportacion di hobennan cu no ta haya guia. Ta ora cosnan sosode, ta tira un bista un rato pero no ta gara e asunto.
Problema serio di bully: El a menciona e mentalidad di mucha cu ta bully otro y ora nan mira otro ta pensa riba bringa. Cada vez ta mira cu hobennan ta bay forma parti di gang pa demostra cu nan ta tof.
E abogado a mustra cu nan ta bully L.L. constantemente y cada vez e ta purba evita confrontacion. L.L. no ta den ningun gang. Pasobra L.L. ta amigo cu Sami di Pos Chiquito, esnan di Village ta kere cu e ta forma parti di gang di Pos Chiquito.
- Kip a puntra; “Kico a pasa cu L.L., kende no tin ningun problema, ta bay busca un arma y awor ta dilanti Hues?. El a remarca cu ta dificil pa pone bo mes den zapato di un hende cu constantemente ta worde gepest (bullying).
Busca arma pa defende su mes: E abogado a mustra cu L.L. ta di San Nicolas pero no por cana rond trankil pasobra e ta worde molestia. Di otro banda tin un grupo cu ta forma parti di gang di Village y ta conoci pa Polis, ta blo molester L.L. Esakinan ta esnan cu ta molestia esnan cu no kier problema, entre otro L.L. Esnan cu a ataca L.L. tambe ta forma parti di gang di Village.
Incidentenan cu a sosode promer a causa cu L.L. a bay busca arma pa defende su mes. El a worde ataca anterior na Rodgers Beach y dos homber a horta cadena di dje. Sin ningun motibo dos homber ta ataca L.L. y nan ta bis’e kico e ta kere cu e por haci. L.L. a keda trankil pa evita problema.
Nan a sigui bully L.L. y riba facebook tabata provoca L.L. Pero asina mes L.L. no ta haci nada. L.L. no kier a bay haci denuncia pa no worde yama “snitch”.
Ataca pa dos homber y a tira: Dia di e incidente, L.L. a mira nan den auto N.B. y Bob y el a kita bay otro caminda. Esnan den auto a core bay para otro caminda pa warda L.L. Ora L.L. a topa nan y nan a sali bay riba dje, el a purba core bay. Nan a gar’e. El a bisa nan pa nevermind problema. Pero asina mes nan a atak’e.
- Kip a mustra cu Bob tabata envolvi den hincamento cu hende a muri y ta afor. N.B. ta esun cu a choca L.L. E abogado a splica Hues cu L.L. no a bisa nada pasobra e ta kere cu si e papia e lo bira victima den KIA. Den su desesperacion, caminda N.B. a chok’e y Bob cu un screwdriver den man, el a saca e arma y un tiro a sali di sorpresa.
E abogado a bisa Hues cu L.L. a kere cu si e tin un arma y mustra esnan cu ta molesti’e, ta suficiente pa spanta nan. L.L. no tabatin intension di herida ningun hende. E no a sali for di cas cu intension di tira of herida esnan cu ta molesti’e. El a sali pa bay cerca un amigo. Ta e dos hombernan a bay busca L.L. pa horta su cadena.
E abogado a mustra cu L.L. ta siguiendo curso den KIA pa ta den bon caminda. El a siña welder y yoga. E abogado a sigui bisa cu tin varios di esnan di gang di Village den KIA.
El a bisa Hues cu si L.L. keda mas tempo den KIA, lo no ta beneficioso. El a mustra cu L.L. su pensamento ta cu e ta laga nan den man di Dios. L.L. kier bay Hulanda pa sigui studia. El a pidi Hues pa duna L.L. un castigo condicional cu tempo di prueba di 2 aña.
Hues a sera tratamento di e caso y a bisa cu dia 29 April 2022 pa 8:15’or di mainta lo tin sentencia.
