ORANJESTAD (AAN): Diabierna mainta tabatin un interesante caso den Corte caminda un hoben di 19 aña a tira un hoben kende hunto cu un otro a atak’e y ranca un cadena di garganta bay cun’e.
Durante tratamento di e caso a bin resulta cu e hoben L.L. tabata victima di bullying (termento) constante y dos biaha a worde atraca y cadena ranca for di dje. El a dicidi di fia un arma pa defende su mes y a hay’e ta tira.
Fiscal, teniendo cuenta cu e circumstancia a exigi 4 aña di prison. Abogado mr. Kip ta haya cu L.L. tabata un victima di bullying di e gang di Village y na dado momento e no tabata por mas.
Den e articulo aki DIARIO ta concentra riba e parti di tratamento di e caso y exigencia di Fiscal. Den un otro articulo ta publica e parti di defensa. Esaki pa mustra con serio e problema di bullying ta y kico ta pasa ora no atende cu e asunto aki na tempo.
Acusacion: E acusacion cu Fiscal a presenta den Corte contra e homber L.L.(19) ta, cu riba 20 September 2021 el a purba mata e homber N.B. door di tira riba dje y tabatin un arma di candela cun’e.
Den sala di Corte tabata presente mayornan di L.L. y tambe henter un grupo di agentenan di Polis. Nan a bin scucha caso di Corte y pa casualidad nan a scucha e caso aki cu tabata hopi interesante.
Tiramento den San Nicolas: Hues a puntra L.L. si ta berdad e acusacion. Segun L.L. e no tabata intencional. El a bisa cu durante bringamento e tiro a los. Hues a mustra cu e homber N.B., kende a resulta di ta e victima, dia 21 September 2021 a declara na Polis cu nan tabata core den auto y L.L. a cruza caya y keda mira nan. Bob y N.B. a baha y puntra L.L. kico ta e problema.
Despues ora el a bay subi auto, el a tende un tiro y sinti algo na su man. A resulta cu el a worde tira den man. Segun L.L., nan a bay riba dje cu un screwdriver y a lucha cun’e y bay cu su arma di candela.
Hues a puntra L.L., pakico e tabata cana arma. L.L. a splica cu e tabata cana arma pasobra e hendenan ey tabata bully e constantemente y tabata atak’e. L.L. a bisa cu e tabatin problema cu un tal Popo kende a kita un cadena di garganta for di dje.
Segun L.L. el a fia e arma algun dia promer cu e sucedido. Despues di e tiramento el a duna e doño e arma back. E no kier bisa kende ta doño di e arma pa no hink’e den problema.
Segun L.L. ora el a saca e arma durante e luchamento, e arma a tira. El a check si e no tabata herida y ora el a mira cu e no tabata herida, el a core bay.
Hues a bisa cu tin un testigo homber G., a bisa cu el a tende un tiro y a mira L.L. ta core bay cu un arma den su man. L.L. a desmenti cu el a core bay cu e arma den su man. Hues a mustra cu ta ora cu N.B. tabata drenta auto, el a worde herida. E ta haya cu loke L.L. ta bisa no ta cuadra cu e berdad. L.L. a bisa cu ta ora nan tabata coriendo bay, el a los un tiro.
Problema cu gang di Village: Hues a mustra cu un amigo di L.L. a declara cu L.L. tin problema cu un grupo di Village cu a horta un cadena di dje. E grupo ey a bay na un cas pa bati L.L. cu bate y machete.
El a bisa cu dia 20 September 2021, ora el a yega cas, el a haya L.L. ta ward’e y a bis’e cu nan a bringa cun’e. Hues a puntra L.L. si e ta forma parti di un gang. El a bisa cu no. Door cu L.L. ta bay cerca amigonan na Pos Chiquito, hende lo ta kere cu e ta forma parti di gang di Pos Chiquito. L.L. ta biba na San Nicolas.
Fiscal a puntra L.L. pakico anterior e no a haci keho. L.L. a bisa cu e no kier pa tin mas problema. Fiscal a remarca cu awor ora e sali for di KIA, e problema lo bay sigui. El a mustra cu L.L. a scoge pa cana cu arma y e problema ta bira mas serio.
Fiscal a haci L.L. serie di pregunta encuanto e arma. El a remarca cu e arma no ta tira riba su mes. L.L. a bisa cu un biaha e persona a splica con e arma ta traha pero e no a paga bon tino.
Raport Reclassering: Hues a mustra cu segun e raport di Reclasering ta mustra cu L.L. a bisa cu desde cu su amigo Sami di Pos Chiquito a worde tira mata, e tin problema cu esnan di Village. L.L. ta pensa cu door cu e tabata amigo di Sami, nan lo tin problema cun’e.
E conoce esnan di Village. Reclasering ta conclui cu e chens ta chikito cu L.L. lo bolbe haci’e. Reclasering ta haya cu mester guia L.L. pa e siña atende y resolve problema.
Fiscal: Fiscal a bisa Hues cu tin diferente declaracionnan cu gañamento. Ta pesey tin hopi documento di e caso. A lo largo por a bin sali na cla cu e duo a bay ataca L.L. pa kita su cadena. L.L. a saca arma y tira caminda N.B. a resulta herida na man.
Na opinion di Fiscal, door di rabia L.L. a tira riba N.B. El a bisa Hues cu ningun momento L.L. a declara cu el a tira dirigi of el a tira pa spanta of e tiro a sali di sorpresa. Fiscal a remarca cu tira cu un arma riba distancia chikito y sin sa con pa tira, ta core riesgo cu por mata hende. Kico a pasa si e bala a impacta N.B. den cabez.
El a mustra cu 1 luna promer por a mira riba un Security Camera video, con un grupo, den cual N.B. tabata, a core tras di L.L. cu bate y machete. E doño di e cas caminda e incidente a sosode, a dicidi di yama Polis. Pero e luna ey L.L. mes no a haci denuncia. Fiscal a bisa cu L.L. a dicidi di busca un arma pa defende su mes, siendo cu e por a informa Polis pa evita mas problema.
No defensa propio: Na opinion di Fiscal, Ta un hecho cu L.L. a worde ataca pero ta despues cu a kita e cadena, L.L. a saca arma y tira. Pesey Fiscal ta haya cu no por papia di defensa propio.
Fiscal a bisa cu e no ta kere cu e tiro a sali di accidente. El a mustra riba hurisprudencia cu si un hende ta cana arma y presenta un situacion no por papia di defensa propio.
Posesion di arma un problema serio: Fiscal ta haya proba cu L.L. a tira y tabatin un arma di candela. El a bisa Hues cu for di e raport di Reclassering ta mira cosnan positivo pa L.L. y no cu e ta bayendo den mal caminda. Fiscal a mustra cu pa tira riba un hende tin castigo di 5 pa 6 aña di prison.
El a bisa cu e tiramento a tuma lugar den oranan di atardi den San Nicolas caminda tabatin mas hende den vecindario. E testigo tabata canando eybanda y a sucha tiro.
Posesion di arma ta un asunto serio y pesey Ministerio Publico ta baha cu man duro. E gangnan na Aruba ta forma peliger pa tur hende. Fiscal a sigui bisa cu pa cana cu arma so ta castiga 2 aña di prison.
Castigo: Pa cu e castigo, Fiscal a tene cuenta cu edad hoben di L.L., cu el a worde atraca, ta promer biaha cu e ta cay sera. E rapport di Reclassering ta convence Fiscal pa duna castigo mas abao pasobra e ta mira cu L.L. tin un futuro. El a exigi 4 aña di prison.
Hues, despues di a scucha abogado mr. Kip, a sera tratamento di e caso y a bisa cu e ta bay studia e caso y dia 29 April 2022 pa 8:15 am lo tin sentencia.
