Huez a bolbe rechaza e peticion
ORANJESTAD (AAN): Manera DIARIO a publica, ayera mainta Hues a dicidi riba e lista di peticionnan di abogadonan den e caso Avestruz. Hues basicamente a mantene su decision di 9 Februari 2022 pa loke ta e documentonan di Sevinger cu e abogadonan a pidi.
Hues Comisario lo interoga testigonan: Den sala di Corte tabata presente e abogadonan di e 12 sospechosonan. Hues a bisa cu lo manda e caso pa Hues Comisario pa scucha tur e testigonan cu a keda aproba.
Hues a bisa cu esaki ta conta tambe pa esnan cu abogadonan a pidi pa Hues scucha durante tratamento di e caso.
Varios sospechoso lo ta testigo: Hues a bisa cu tur esnan cu Fiscal a aproba lo keda. E otronan cu Fiscal no ta haya relevante lo no worde aproba. Por a scucha Hues menciona nomber di varios di 12 sospechosonan den caso Avestruz, kendenan lo worde scucha como testigo.
Hues a rechaza tambe e peticion pa scucha cierto abogadonan cu a representa compania of persona. E ta haya cu esaki no ta relevante.
No ta duna documentonan di Sevinger: Pa loke ta e peticion di varios abogado pa e documentonan cu Sevinger a duna LandsRecherche relaciona cu dunamento di tereno, Hues a mantene su decision di 9 Februari 2022.
Hues a bisa cu mescos cu el a bisa na Februari 2022, no ta entrega abogadonan e documentonan cu Sevinger a duna LandsRecherche. Hues a bisa cu esakinan lo bay forma parti di documentonan di e caso.
Na Juni 2022 lo sigui: Hues a bisa cu mirando e cantidad di testigonan cu lo mester worde scucha, el a fiha 14 Juni 2022 pa 11’or di mainta, lo topa den sala di Corte pa mira con leu a yega cu e interogacionnan y asina planea kico lo bay sosode cu tratamento di e caso Avestruz.
