El a worde condena na multa di 4 mil Florin y castigo condicional - ORANJESTAD (AAN): E homber Americano J. no tabata presente durante tratamento di su caso.
Su abogado mr. Kip tabata presente. El a bisa Hues cu su cliente ta na Merca y ta hayando tratamento psikiatrico.
Fiscal ta haya J. culpable di a tacha e honor di e dama di 'room service' y a exigi un multa di 4 mil Florin of 80 dia sera den KIA. Tambe Fiscal a exigi 1 luna di prison condicional. Hues a haya J. culpable y a confirma e exigencia di Fiscal.
PURBA ABUSA DI DAMA:
Durante tratamento di e caso, Hues a bisa cu segun e procesverbaal di Polis, e homber J. na September 2020 a sera porta di camber ora e dama di 'room service' a trece cos p’e.
- lo tabata kier a tene relacion sexual y a purba kita su paña. Ta asina cu J. a saca su parti intimo y a masturba dilanti e dama di 'room service'.
Ta asina cu J. a admiti di a pidi e dama pa tene relacion sexual y a mustra su parti intimo. Segun J., e no a forza e dama.
EXIGENCIA DI FISCAL:
Fiscal a bisa Hues cu e no tin duda den declaracion di e dama. Fiscal ta haya cu J. a tacha e honor di e dama cu a bay duna 'room service'. E homber J. a masturba dilanti e dama. Fiscal a bisa cu e dama no por a haci nada pasobra e homber J. tabata para dilanti e porta.
Ademas e dama mester a laga J. firma un cheque cu su hefe a bis’e pa laga J. firma. Ta momento cu un otro dama di house keeping a bati na porta, e dama a haya chens di sali.
Fiscal ta haya J. culpable di a tacha honor di e dama. El a bisa cu gerencia di e hotel a saca e homber J. di biaha for di hotel. E ta haya cu J. a actua pa satisface su mes.
Fiscal a bisa cu J. a bay Merca back y pesey ta exigi un multa halto di 4 mil Florin of 80 dia sera. Ademas Fiscal a exigi castigo condicional di 1 luna di prison cu 2 aña prueba.
ABOGADO:
Abogado mr. Kip a bisa Hues cu dia 2 September 2020, Polis a detene J. El a bin Aruba na 2010 cu un dama cu kende despues el a casa. Despues a divorcia y tabata depresivo. El a bin Aruba, hopi tristo pasobra su tanta a muri.
El a keda den camber cuarentena. E comportacion di J. tabata riparabel. E tabata pidi room service pa hiba hopi bebida y tabata busca un muher pa compañe. E dama di room service a hiba cosnan y J. tabata kier tin relacion sexual cun’e. J. a saca su parti intimo pa e dama. Door di su actitud, hotel a pidi’e pa bandona e hotel.
Na opinion di abogado, e pildernan di depresion cu J. a haya pa bebe, hunto cu alcohol, a hink’e den un situacion no normal. El a hasta resisti contra su detencion y a worde bati door di Polis. E abogado a bisa Hues cu mentalmente J. tabata afecta y Polis no tabata sa. Na Merca esaki tambe tabata sosode y hende ta worde tira mata door di Polis.
Aki na Aruba, despues di maltrato, a hiba J. hospital y un docter di Respaldo a bay duna asistencia. El a worde laga liber riba orden di Fiscal y hiba un otro hotel y su siguiente dia el a bandona Aruba.
E abogado a bisa cu J. ta desmenti di a tene e dama na su man y a stroba e dama pa sali for di e camber. El a desmenti di a haci actonan inmoral cu e dama. E abogado ta haya cu J. a bay di mas pero no por papia di a haci actonan inmoral. Na opinion di e abogado, e dama por a sali for di e camber. El a bisa cu ora hende bati na parto, e dama a bay habri e porta. Esey ta mustra cu J. no tabata para dilanti di e porta pa stroba e dama pa bay.
E abogado a bisa Hues cu J. ta hayando tratamento psychiatrico na Merca. El a pidi Hues pa tene cuenta cu J. su estado mental.
SENTENCIA:
Hues a sera tratamento di e caso y a dicta sentencia di biaha. Hues ta haya J. culpable di a purba tene relacion sexual cu e dama di room service. Hues ta tuma na malo cu J. como turista ta masturba dilanti un dama cu ta hiba cos den camber pa room service.
Hues a remarca cu J. por tabata mentalmente no normal pero no cu e no ta responsabel pa su actonan.
Hues a confirma e exigencia di Fiscal y a condena J. na 4 mil Florin y si no paga 80 dia den KIA. Tambe Hues a condena J. na 1 luna condicional di prison cu 2 aña di prueba.
