ORANJESTAD (AAN) – E Secretario General di Aruba Voetbal Bond, R.G. a presenta den Corte pa e caso penal cu Ministerio Publico a cuminsa contra dje.
E ta wordo acusa di falsificacion di firma di e president di RCA Club. R.G. a bisa Hues cu el a pidi autorizacion di e president pa yena e formulario pa RCA por participa den campeonato internacional. Fiscal a haya R.G. culpable y a exigi castigo combina. Hues a confirma esaki tambe.
FALSIFICA FIRMA
Hues a mustra cu R.G. ta wordo acusa di falsificacion di firma di president di RCA Club riba un formulario riba 22 Januari 2021. R.G. como Secretario General di Aruba Voetbal Bond a bisa Hues cu el a haya autorizacion di e president di RCA pa yena e formulario digital pa nan participa den campeonato internacional. El a marca un firma bou nomber di e president di RCA y manda esaki. Segun R.G., el a haci esaki den pasado caba, 3 biaha haci’e pa RCA. E promer formulario na November 2020 pero door di Covid a stop esaki. Na Januari 2021 mester a bolbe confirma RCA su participacion.
R.G. a admiti cu riba e formulario no tin firma di president di RCA. El a splica cu nunca e president ta firma riba e formulario. Ta pesey ta pidi autorizacion.
Hues a mustra cu e biaha aki, cos a bay robez door cu R.G. a yena robez cu RCA no ta participa. E ora ey a haci rectificacion y e mesun cos a yena formulario pero e ora ey si e president, cu tabata den oficina, a firma. R.G. a bisa Hues cu despues RCA ariba su mes, a distancia di e campeonato mirando e situacion di Covid.
FISCAL
Fiscal ta haya legalmente proba cu R.G. a falsifica firma. Fiscal a mustra cu R.G. mes a admiti di a haci un firma cual no ta di e president di RCA riba e formulario. Na opinion di Fiscal, R.G. a bisa cu el a yena e formulario cu autorizacion di RCA. Esey no ta kita afor cu R.G. ta pone firma bou nomber di e president di RCA, siendo cu e no ta e president. Fiscal ta haya cu si R.G. a haya autorizacion, e mester a indica riba e formulario cu el a haya autorizacion.
Fiscal ta haya cu esaki ta falsificacion di firma. Fiscal a bisa cu e ta tene cuenta cu R.G. kier a inscribi RCA pa participa den e campeonato. El a exigi den forma di un aviso pa R.G., 60 ora di trabao pa comunidad pero condicional cu un tempo di prueba di 2 aña.
ABOGADO
Abogado mr. Marchena a bisa Hues cu R.G. ningun momento kier a falsifica firma di president di RCA. E kier a solamente yuda pa nan participa den campeonato internacional mirando cu e tempo pa inscripcion tabata cla pa caduca. Segun e abogado, tin mail di e president di R.C.A. na R.G. cu RCA kier participa den e campeonato internacional di voetbal. Como Secretario General di Aruba Voetbal Bond, R.G. a inscribi RCA. Ta custumber cu e club campeon ta participa. Segun mr. Marchena, e invitacion ta yega na Aruba Voetbal Bond (AVB) y no na e clubnan di voetbal. Ta via AVB, un club por inscribi. El a bisa cu anterior R.G. a haci’e caba pero door di Covid, e campeonato no a sigui. E formulario ta digital y si no haci un firma, e no ta keda registra. E abogado ta haya cu mester declara R.G. liber di a haci falsificacion di firma.
SECRETARIO GENERAL TA LAMENTA
R.G. a bisa Hues cu e ta haya hopi lastima cu pa inscribi un club, e tin cu presenta den Corte siendo cu el a haci’e pa yuda e club. Na yoramento el a bisa cu e ta un error cu ta daña su imagen. El a bisa cu henter e proceso di detencion ta haci manera e ta un criminal siendo cu no ta asina.
CULPABEL DI FALSIFICA FIRMA
Hues a dicta sentencia di biaha. Hues a bisa cu e ta haya legalmente proba cu R.G. a falsifica firma di president di RCA den e formulario di campeonato internacional. Hues a bisa cu e no ta convenci cu un tempo di prueba lo evita cu R.G. lo no bolbe haci’e. Hues a mustra cu R.G. mes a bisa cu diferente biaha el a haci’e. Hues ta haya cu no ta na su lugar cu R.G. ta haci asina. El a bisa cu R.G. por a laga e president firma manera despues si a sosode.
Hues a confirma e exigencia di Fiscal y a condena R.G. na un castigo condicional di 60 ora di trabao cu un tempo di prueba di 2 aña.
