ORANJESTAD (AAN) – E homber P.V. acusa di importa 991 gram di marihuana entre 8 Augustus 2019 y 20 Augustus 2020, a admiti den Corte cu el a bay haci un amigo M. fabor di busca un pakete.
El a bisa Hues cu no tabata intencional y no tabata sa cu tabatin droga scondi den e pakete. Fiscal a exigi 180 ora di trabou of 90 dia sera. Hues a keda di bay studia e caso y otro siman lo tin sentencia.
DROGA SCONDI
Durante tratamento di e caso, P.V. a bisa cu el a haci fabor na M., kende for di Hulanda a pidi’e pa busca un pakete cu el a manda riba nomber di P.V. Ta asina cu M. a bolbe Aruba promer cu e pakete a yega y a bay cu P.V. na e lugar pa busca esaki. P.V. so a baha pa busca e pakete y Douane Recherche a haci control riba e container. A usa cacho anti droga cu a reacciona riba e pakete. Den e pakete tabatin filternan di stofzuiger y den esakinan tabatin marihuana scondi. Segun P.V., Recherche a bis’e cu e lo haya un multa. El a bisa Hues cu e tin bon amistad di M. y no a kere cu M. lo a bay haci algo asina cun’e. Awor el a kibra amistad cu M., kende segun P.V. ta un hende hopi agresivo.
FISCAL
Fiscal a bisa cu e ta haya legalmente proba cu P.V. ta culpable di importacion di marihuana. El a bay busca e pakete den cual Douane a haya marihuana scondi den filter di stof zuiger. Fiscal a bisa cu Polis no por haya M. El a mustra cu P.V. solamente sa e nomber Mauricio y nada mas. Fiscal ta haya esaki straño. E ta haya cu P.V. mester tabata mas cuidadoso ora ta laga Mauricio skirbi su nomber riba pakete. Traficacion di droga ta un problema cu ta fomenta criminalidad. Tin castigo pisa pa cu casonan asina. Fiscal a tene cuenta cu ta promer biaha cu P.V. ta cay den man di husticia y cu e caso ta di 2019. El a exigi 180 ora di trabou of 90 dia sera.
ABOGADO
Mr. Fraser a bisa cu V.P. a haci un fabor pa su amigo M., kende ta traha riba P.V. su auto. E abogado a bisa Hues cu V.P. a duna Polis informacion di M. A bay na e cas pero no a hay’e. E abogado a remarca, pakico Polis no a sigui investiga? A haya sa su numbernan di cellular pero no a haci nada. E abogado a mustra cu V.P. no tabatin intension pa importa marihuana. E no ta usa droga. Na opinion di e abogado, no por prueba cu intencionalmente V.P. a importa droga. E no a pensa cu lo tabata un problema haci un fabor pa M. Despues di 2 aña, Polis no a haci ningun investigacion pa realmente gara M. cu ta importa droga for di Hulanda.
Hues a sera tratamento di e caso y a bisa cu e lo bay studia e caso. El a bisa cu 15 Juli 2021 pa 8.30. lo tin sentencia.
