Hues no a honra exigencia di Fiscal di 4 aña di prison
ORANJESTAD (AAN): Diabierna mainta den Corte di Husticia a trata e caso penal cu Ministerio Publico a cuminsa contra e homber C.G. di 18 aña, kende ta wordo acusa di a los 6 tiro riba un auto na San Nicolas. Fiscal ta haya C.G. culpabel di intento mata y a exigi e maximo di ley hubenil esta 4 aña di prison.
Hues no a honra e exigencia di Fiscal. Hues a bisa cu e no por duna e castigo maximo pasobra no tabatin herido. Si presenta un caso caminda un hoben a tira mata un persona, e ora ey lo por aplica e maximo di ley hubenil. Hues a condena C.G. na castigo combina esta 3 aña di prison di cual 1 aña ta condicional cu un tempo di prueba di 3 aña y bou guia di Reclassering.
Acusacion: E acusacion cu Fiscal a presenta den sala di Corte ta cu C.G. ta wordo acusa di riba 22 Januari 2023 a purba mata e homber T. y otronan door di los 6 tiro riba dje cu un arma di candela. Tambe Fiscal ta acusa C.G. di posesion di un arma di candela.
Tira 6 biaha riba auto: Hues a mustra cu 22 Januari 2023 mas o menos 7’or di mainta, Polis a bay Caya Captain Rodgers na San Nicolas, den vecindario di e porta di entrada pa Refineria, caminda tabatin tiramento. Polis a haya huls riba caya.
Dos homber a papia cu Polis. Un di e hombernan a bisa cu e tabata canando den oranan di mainta y a scucha 3 tiro. El a mira algun auto para den vecindario di e entrada di Refineria. Polis a haya imagennan di video di seguridad y a reconoce C.G., kende diripiente a saca algo for di carson. E tabata cana cu un otro homber y na dado momento a mira C.G. dirigi arma den un direccion dos biaha. E homber T. a bisa Polis cu e tabata core un Nissan March y na entrada di Refineria tabatin un grupo hende para. Ora el a pasa nan grita algo. Un hende a tira piedra cu a dal e auto. El a para, sala for di auto y kier a tira boter den direccion di e grupo. El a scucha tironan y a core bay sconde tras di e auto. Polis a constata cu riba e auto tabatin 2 impacto di bala.
A haya 6 huls y un bala den e auto. A base di e camera, Polis a detene C.G. Na Polis e no kier a bisa nada y na Hues Comisario el a bisa cu el a tira. Den Corte, C.G. a bisa Hues cu un rato promer un Nissan March a pasa y esnan den auto a los dos tiro den laira dilanti e grupo y core bay. Segun C.G., despues di un rato un Nissan March, mesun color, a bolbe pasa y el a kere ta e mesun hendenan. E ora ey, el a tira 6 biaha. Segun C.G., tironan tabata pa spanta esnan den e auto y ningun momento su intension tabata pa mata.
Sospechoso no kier papia: Hues a haci C.G. preguntanan y e no kier bisa for di unda el a haya e arma. Fiscal a pasa e video di seguridad caminda a mustra e grupo ta para na porta di Refineria. Fiscal tabata haci C.G. diferente preguntanan. C.G. a bisa cu nan a sali di un club nocturno na Palm Beach y despues a bay na porta di Refineria. El a bisa cu na e club nocturno e no tabatin e arma y ora di bay pariba el a busca e arma. E no kier a bisa unda el a haya e arma. El a bisa cu tabatin un otro problema cu persona di un gang. Fiscal tabata kier sa mas pero C.G. a bisa cu e no ta bay menciona nomber.
Fiscal: Fiscal a bisa cu un hoben ta dilanti Hues pa dos hecho serio. Intento di mata un hende y posecion di arma di candela. Segun Fiscal, despues di a haci diferente pregunta den Corte, por saca afor kico tabata e motibo cu a tira. El a conclui cu promer, un Nissan March a pasa y los dos tiro. Ora cu e auto a pasa, C.G. a kere cu ta e mesun Nissan March. Fiscal ta haya cu C.G. a tira riba hende robez. El a bisa cu investigacion cu Polis a haci ta mustra cu e bala cu a haya den e auto di T. ta cuadra cu e huls haya riba caminda. E ta haya legalmente proba cu C.G. a tira. Fiscal ta considera esaki un intento di mata. Na opinion di Fiscal, e hecho cu C.G. a tira 6 biaha riba e auto, el a tuma e chens cu e lo por a mata hende.
Segun Fiscal, facil e tiramento por a bira fatal y e ora ey C.G. no ta dilanti Hues pa intento di mata sino asesinato. El a bisa cu ta un milager cu ningun bala a herida hende cu consecuencia fatal. El a bisa cu C.G. mes a bisa cu ta promer biaha cu e ta tira un arma. Tambe Fiscal ta haya proba cu C.G. tabatin un arma di candela. El a bisa cu arma di candela ta sumamente peligroso. Tabatin casonan di tiramento y hasta casonan di asesinato. Fiscal a sigui bisa cu hendenan inocente por a wordo mata. Fiscal ta haya cu mester aplica castigo hubenil pasobra C.G. tabatin 17 aña. El a bisa cu C.G. su actitud den Corte ta mustra cu e ta un mucha y no ta realisa kico el a haci y tampoco no a bisa cu e ta arepenti di loke el a haci. Fiscal exigi 4 aña di prison.
Abogado ta cuestiona: mr. Zara a cuestiona e hecho cu Reclassering no a bay papia cu C.G. E ta haya importante pa Reclasering a evalua C.G. pa sa kico exactamente ta pasando cu e sospechoso.
Cambia forma pa entrega arma: E abogado a mustra cu Ministerio Publico ta pidi pa entrega arma di candela pero e hecho cu mester bay duna declaracion na Polis, ta pone cu e no ta duna resultado. E abogado ta haya cu mester cambia e forma pa asina haya mihor resultado cu entrega di arma. El a mustra cu e mayoria di e armanan ta di Sur America y hopi a wordo usa aya banda pa mata hende.
Mester yuda acusado: E abogado a bisa Hues cu C.G. a tira pa spanta y no tabata su intension pa mata. El a remarca cu e castigo exigi pa Fiscal ta hopi halto. Na opinion di e abogado, kico C.G. lo bay haya di educacion na KIA. Lo ta mas na su lugar pa busca un guia pa C.G. E ta kere cu tin presion riba C.G. y pesey e no kier papia. E abogado ta kere cu mester yuda C.G. pa e sali for di problema. El a pidi Hues pa duna C.G. un parti di castigo condicional cu ta forma un presion riba C.G. pa e cambia. Mr. Zara a pidi Hues pa duna C.G. un castigo mas abao y bou guia di Reclassering.
Sentencia: Hues a sera tratamento di e caso y a dicta sentencia di biaha. Hues ta haya legalmente proba cu C.G. a tira cu un arma di candela 6 biaha riba e auto di T. Hues a bisa cu tin un problema grandi na Aruba cu hobennan ta cana cu arma di candela. Dos cos por pasa cu arma di candela, menaza of mata un hende. Pa cu e castigo, Hues a bisa cu e ta tene cuenta cu ta promer biaha cu C.G. ta cay sera y e ta menor di edad. Hues a bisa cu e no ta haya cu C.G. ta conciente di loke el a haci ta hopi serio. Hues ta haya cu mester aplica castigo hubenil.
Hues a bisa cu e no ta comparti opinion di Fiscal pa e castigo maximo hubenil di 4 aña. Hues a bisa cu ningun hende a resulta herida. Den un caso caminda hende a resulta herida of hende a fayece, e ora ey lo por aplica e castigo maximo. Hues a condena C.G. na 3 aña di prison, di cual 1 aña ta condicional cu un tempo di prueba di 3 aña. Hues a bisa cu durante e tempo di prueba, C.G. ta cay bao guia di Reclassering.
