Otro luna lo tin sentencia
ORANJESTAD (AAN): Dialuna merdia 2.30, Corte den Promer Instancia a trata e caso sumario cu Minister Rocco Tjon a cuminsa contra Patrick Paskel y Nelson Cabral de Andrande (Speed) di Enfoke. E mandatario Tjon a cuminsa e caso sumario pa exigi cu Paskel y Speed ta rectifica e acusacionnan haci dia 1, 2, 3, Augustus 2023 den Enfoke.
Abogadonan mr. Reinkemeyer y mr. Ruiz a representa Minister Tjon mientras cu abogado mr. D. Kock a defende Paskel y Speed.
RECHAZA PA SCUCHA 2 TESTIGO
Pafor di sala di Corte tabata sinta dos ex agente di Polis, kendenan a wordo yama como testigo di parti di Paskel y Cabral de Andrade.
Den Corte, Hues a bisa cu e ta trata prome e parti di peticion di mr. Kock pa scucha 2 testigo y tuma un decision di biaha. Despues Hues a sigui cu e caso di rectificacion mes.
Abogado mr. Kock a bisa Hues cu e dos testigonan lo por duna mas informacion. E abogado a bisa Hues cu Paskel y Speed den Enfoke lo a presenta cierto cosnan cu nan tin fuente di informacion.
E abogado ta haya cu no por ta asina cu promer cu haci expresionnan, esun cu ta wordo cuestiona lo mester haya por escrito di fuentenan. Esey lo causa cu tur cos lo cay na awa. E abogado a bisa cu ta keda na Hues si lo bay scucha nan ya cu Hues no ta obliga pa scucha testigo.
Mr. Reinkemeyer a bisa Hues cu e y mr. Ruiz a keda sorprendi cu awor mr. Kock kier bin cu testigo. E abogado a bisa Hues cu despues cu Paskel y Speed a haci acusacionnan contra Minister Tjon, a pidi rectificacion y nan no a haci. Awor nan ta bin cu testigonan.
E abogado ta haya cu mr. Kock ta purba tarda e proceso. Mr. Ruiz a bisa cu promer Paskel y Speed ta bisa cu nan no kier divulga nan fuente pero awor kier bin cu dos testigo mustrando cu awor si nan kier divulga nan fuente. Na opinion di mr. Ruiz tin regla cu periodista mester haci su investigacion corecto promer. Awor cu nan mester presenta dilanti Hues, awor nan kier bay haci investigacion.
Hues a dicidi cu a base di ley e por laga scucha testigo. Hues ta haya cu den un caso sumario no tin lugar pa scucha testigo. El a rechaza e peticion y cu Paskel y Speed mester paga mas cu mil florin pa e caso aki.
TJON TA EXIGI RECTIFICA
Mr. Reinkemeyer y mr. Ruiz a hiba palabra caminda nan a mustra cu Patrick y Speed dia 1 Augustus 2023 a cuminsa un atake politico contra Minister Tjon. Nan a bisa den Enfoke cu tempo cu Tjon tabata inspector di Polis, el a haci cu mes culpabel di corupcion, door di tuma placa pa cambia informacion den procesverbaal di Recherche. Tambe nan lo a bisa cu Tjon a wordo deteni y interoga door di Landsrecherche.
Segun e abogadonan, Paskel y Speed a bisa cu nan ta al tanto y tin potret di orden di detencion di Tjon. Su siguiente dia, nan a sigui hunto caminda a bisa cu 3 agente di Polis a wordo deteni y cu Tjon lo ta envolvi den e cambiamento di informacion.
Paskel y Speed a sigui haci denuncia y ora cu Tjon a pidi pa rectificacion, 7 Augustus 2023, Paskel y Speed a sigui haci denuncia pero no a haci rectificacion.
Tjon mes a haci un declaracion via facebook. E abogadonan ta haya cu un periodista mester haci investigacion corecto promer cu e haci publicacion. Nan no a haci pregunta na Tjon relaciona cu e caso sino a bay tras di loke a tende.
E abogadonan ta haya cu no tin ningun prueba di loke ta acusa Tjon y pesey Paskel y Speed mester rectifica. E abogadonan a bisa cu e acusacion di corupto den comunidad ta algo hopi serio. Esnan cu ta scucha e programa ta kere cu Tjon ta corupto cual no ta asina. E abogadonan ta insisti pa rectificacion.
TJON TA GAÑA
Abogado mr. Kock a bisa Hues cu a base di combersacion cu Paskel y Speed tabatin cu e ex casa di Tjon, por a compronde cu lo a interoga Tjon den un caso di investigacion inhusto cu ruman di Paskel como Polis hunto cu otro coleganan a haci na un cas. A pone arma na cabez di hende y haci investigacion den e cas.
Lo tin 3 agente lo a cambia e procesverbaal y lo tin un agente X kende segun Kock lo ta Tjon. E abogado a bisa Hues cu diferente biaha 24ora a purba di entrevista Minister Tjon na conferencia di prensa, pero e ta nenga di papia di 24ora.
Segun mr. Kock, Tjon ta gaña di nunca a wordo deteni y interoga, siendo cu di parti di Ministerio Publico a sali un articulo cu a interoga Tjon. E abogado ta haya cu segun hurisprudencia, tin libertad di prensa.
Mr. Kock ta haya cu Paskel y Speed a publica e reaccion di Tjon caminda el a desmenti di tabata deteni pa interoga como testigo. E ta haya cu Paskel y Speed a cumpli cu reglanan di periodismo. Mr. Kock a bisa cu lo por haci un caso mas profundo caminda lo por bay scucha e testigonan pero di parti di Tjon mester ta dispuesto.
El a pidi Hues pa no dicta sentencia pa rectifica di biaha pasobra no tin motibo di urgencia ya cu e caso ta di Augustus 2023. Tambe e abogado a bisa cu e ta haya cu ta solamente Enfoke mester rectifica y no riba facebook por escrito.
Di parti di mr. Ruiz a rechaza pa sigui caso mas profundo. El a desmenti cu Tjon ta nenga di papia cu 24ora. El a mustra cu recien Tjon a duna entrevista na 24ora.
Despues di a scucha e abogadonan, Hues a sera tratamento di e caso y a bisa cu 4 October 2023 lo tin sentencia.
