E lo bay ta na Aruba otro siman pa caso Avestruz
ORANJESTAD (AAN): Leomar Angela, un yiu di tera cu pa mas di 20 aña a bay establece na Curacao, awor ta forma parti di Hof di Corte di Husticia. For di vocero di Corte di Husticia di Antiyas y Hof, a ricibi e noticia cu luna pasa 15 Augustus 2023, Leomar Angela, a huramenta como miembro suplente di Cas di Corte na Curacao.
Fiscal cu a destaca: Promer cu mr. Leomar Angela a huramenta como Hues, e tabata traha na Ministerio Publico di Curacao como Fiscal. Tabatin un temporada cu Angela tabata actua severo contra criminalidad na Curacao.
E ultimo 7 añanan e tabata Abogado General di Ministerio Publico na Curacao y islanan (BES) esta Bonaire y Sint Maarten.
Traha como hues comisario: Promer di a traha na Ministerio Publico, Angela a sigui e curso RAIO na Hof y despues di a caba cu esaki na 2000, el a traha 3 aña como Hues Comisario di casonan penal.
Bin Aruba cu hof: Awor cu Angela ta forma parti di Hof, den su promer aña e lo fungi como suplente miembro di Hof den casonan penal. Esaki, mirando e amplio experencia y afinidad cu Angela tin cu ley penal. Angela lo bay forma parti di e delegacion di Hof pa Aruba y Sint Maarten pasobra anterior e no a traha como miembro di Ministerio Publico na e islanan aki. Otro siman, Angela lo bin Aruba den e delegacion di Hof pa su promer caso cu lo ta e caso Averstruz den Corte Superior cual lo ta pro forma.
Pa loke ta Hof pa Curacao y Bonaire (BES), lo mester evalua pa cada caso cu Angela lo bay forma parti di Hof, si no por papia di conflicto di interes.
Despues di e aña aki, e directiva di Hof lo bay evalua Angela su funcion como Hues. Esaki cu e mira pa posiblemente e lo por keda nombra como miembro di Hof.
