Nan a yega cu boto na Boca Urirama
ORANJESTAD (AAN): E acusadonan Venezolano J.G.P. y D.B.Q. acusa di importacion y posesion di cocaina y marihuana riba 9 Juli 2024, a wordo condena na 3 aña di prison. Ta asina cu ambos a worde deporta for di Aruba y no tabata presente den Corte, pero nan abogado mr. Canwood si.
Importa hopi droga: Sospechosonan J.G.P. y D.B.Q. ta wordo acusa cu riba e marduga di 9 Juli 2024 nan tabatin cantidad droga riba un boto cu a yega na Boca Urirama, cu ta situa 1,8 km Noord-Noordwest di kapel di Alto Vista.
Wardacosta di Caribe Hulandes a detecta prome e boto riba Marine Radar, y a core notifica Polis di Aruba. Patruyanan a bay bon prepara, y a bin topa cu e boto cu 3 Outboard Engine, y abordo tabatin como 7 jerrycan cu gasolin. Tambe a haya varios bulto grandi conteniendo 693 kilo di marihuana, y 7 kilo di cocaina. Mesora a core notifica Autoridad Anti-droga UGC di Cuerpo Policial tambe.
Ta asina cu J.G.P. y D.B.Q. tabata hunto cu otronan abordo. E otronan ya a wordo condena. Nan ta wordo considera complice di importacion di droga.
Fiscal a exigi 4 aña di prison: Na Aruba, Fiscal a bisa Hues cu e ta haya cu e droga aki mester tabata destina pa bendemento. Pa cu e castigo, Fiscal a bisa cu droga ta malo pa salud pa hende. Fiscal a exigi 4 aña di prison pa e duo Venezolano.
Abogado: Abogado mr. Canwood a mustra cu J.G.P. y D.B.Q. a paga 500 Dollar pa bin Aruba pa traha door di e situacion na Venezuela. Na opinion di e abogado, nan no por a aleha di e situacion cu nan tabata aden. El a bisa cu nan a wordo deporta y ta riba black list.
Abogado mr. Canwood a bisa Hues cu ambos a laga sa cu pa di tanto biaha cu nan a bin Aruba pero awor si no tin intension di bin mas.
Sentencia: Hues a sera tratamento di e caso y a dicta sentencia di biaha. Hues a bisa cu e duo ta wordo acusa di ta complice di posesion y importacion di droga. Hues ta haya cu mester prueba cu nan tabata envolvi den e importacion. Na opinion di Hues, por conclui cu nan tabata riba un boto riba cual tabatin droga pero no por papia di complice di traficacion.
Hues a sigui bisa cu e pregunta ta, si nan tabata envolvi den posesion di droga. Ta asina cu nan a aborda e boto bou circumstancianan no normal. Tabatin hendenan cu cara tapa y arma na e boto cu nan mester a aborda. Hues ta haya cu bou di circunstancianan asina, nan tabata envolvi den e transporte y esey ta posesion di droga.
Hues ta haya nan complice di traficacion di droga. Hues a declara nan liber di importacion pero si culpabel di posesion. Hues ta haya importante pa combati traficacion di droga. Pa cu e castigo, Hues a bisa cu mester mira e participacion di e dos hombernan y cu nan tin sentencia anterior.
Hues a condena J.G.P. y D.B.Q. na 3 aña di prison. Door cu nan a wordo deporta, e situacion ta asina cu si nan bolbe Aruba, nan lo wordo deteni y hiba prison pa sinta nan castigo.
