A haya 5 kilo di marihuana y 1 kilo di cocaina den e cas
ORANJESTAD (AAN): E dos hombernan Venezolano J.M. y E.Q. a wordo haya culpabel di bendemento y posesion di droga pero no culpabel di importacion. Ta asina cu nan a wordo deporta for di Aruba y mr. Illes a representa nan den Corte.
Lote di droga haya den cas: Fiscal a bisa Hues cu e duo J.M. y E.Q. ta wordo acusa di venta di cocaina y marihuana entre 2 April 2025 y 22 April 2025. Tambe ta acusa nan di a importa droga.
Hues a bisa cu segun e rapport di Polis, a base di informacion Polis a bay haci investigacion na un cas unda J.M. y E.Q. ta keda. A haya 5 kilo di marihuana y casi 1 kilo di cocaina. Tabatin indicacion cu J.M. y E.Q. tabata bende droga. A haya un schrift cu anotacionnan di bendemento. Polis a scucha testigonan cu lo a cumpra for di e duo. Ta asina cu J.M. y E.Q. a admiti na Polis di tabata bende pa un periodo cortico. E.Q. lo a bisa Polis cu ta riba presion di J.M. e tabata bende pero J.M. a bisa cu ta nan dos tabata bende. Segun J.M. lo tabatin menaza for di Venezuela pa cu e bendemento di droga.
Fiscal: Fiscal a bisa Hues cu e ta haya legal proba cu J.M. y E.Q. tabata bende droga y posecion di marihuana y cocaina. Na opinion di Fiscal, for den e schrift cu anotacionnan por conclui cu ta cantidad grandi di droga J.M. y E.Q. a bende. Fiscal a bisa cu ta casi 20 kilo di marihuana e duo a bende. Tambe cu nan lo a haya 1 kilo di cocaina y a bende e mitar. Den un periodo cortico nan a bende hopi marihuana y cocaina.
Fiscal a bisa Hues cu pa cu e castigo, e no ta kere cu mester mira e periodo sino e cantidad di droga cu a bende. E ta sospecha cu e duo a importa droga pero no por prueba esaki. Fiscal a pidi Hues pa declara nan liber pa importacion di droga.
Fiscal a exigi 40 luna ( 3 aña y 6 luna ) di prison pa ambos. Fiscal a sigui bisa cu e droganan mester wordo destrui. E placanan confisca, 600 Florin y 242 dollar mester keda confisca.
Sentencia: Hues a pospone e caso un rato pa bay evalua y a bin bek y dicta sentencia. Hues a bisa cu e ta haya legal proba cu J.M. y E.Q. a bende marihuana y cocaina. Hues a bisa cu Polis a haya 5 kilo di marihuana y casi 1 kilo di cocaina. Hues no a sigui Fiscal su exigencia. Hues a baha e castigo. Hues a condena J.M. y E.Q. na 2 aña di prison y cu e droganan ta wordo destrui y tur cos ta keda confisca.
