Aunke cu nan tabata desmenti di tabata bende
- Caso di razzia na Sabana Grandi a presenta den Corte
ORANJESTAD (AAN): E homber L.A.T. y e muhe J.K. a scucha Hues condena nan pa tanto posesion como bendemento di droga. Aunke cu e pareha a desmenti di tabata bende droga, Hues ta haya nan culpabel.
Posesion y bende droga: E acusacionnan cu Fiscal a presenta contra e pareha ta cu e muhe J.K. ta wordo sospecha cu entre Januari 2020 te cu Augustus 2026, tabata bende cocaina y tabatin esaki den posesion.
E homber L.T. ta wordo acusa cu entre Januari 2020 y Augustus 2025, e tabatin droga den su posesion y tabata bende. Tambe Fiscal ta acusa J.T. cu riba 29 Juli 2025, el a importa for di Hulanda, un cantidad di marihuana y ecstasy tipo MDNA (XTC).
Importa droga: Hues a cuminsa cu e homber L.T. kende na Juli 2025, cacho anti droga a reacciona riba un pakete cu a bin for di Hulanda p’e. Segun L.T. e droga ta pa su mesun uso. L.T. a reacciona riba e acusacion di Fiscal, mustrando cu entre 2019 te 2022 e tabata na Hulanda. Hues a mustra cu 29 Juli 2025, Douane a controla e pakete cu cacho anti droga a reacciona ariba y a haya 454 gram di Marihuana y 550 pilder di Ecstasy (MDNA). Segun L.T. tur ta pa su propio uso.
Hues a sigui bisa cu e raport di Polis ta mustra cu dia 1 Augustus 2025, Polis a detene L.T. y J.K. ora cu durante investigacion na e cas na Sabana Grandi, a haya balansa, cocaina y un saco cu MDNA. En total 54,24 gram di MDNA. L.T. a keda bisa cu e droga ta pa su propio uso.
Uza droga pa drumi: Hues a sigui cu J.K. mustrando cu segun relato di Polis, a haya J.K. cu 2 paki di cocaina cu ta mas o menos 1 gram. Segun J.K., ta pa propio uso. J.K. a bisa Hues cu e no tin nada di haci cu bendemento di droga.
El a bisa cu e ta traha hopi duro. El a bisa cu e ta huma marihuana anochi pa drumi. El a bisa Hues cu e ta traha bartender. El a splica Hues cu e cocaina e ta usa den un crema di marihuana pa calma dolor na su curpa.
Hopi hende tabata cumpra droga: Hues a bisa cu segun e relato di Polis, tin yamadanan y tambe declaracion di hendenan cu ta bisa cu nan tabata cumpra droga for di L.T. y J.K. Hues mustra cu e homber W. a bisa cu e ta yama L.T. y e ta trece cocaina p’e. El a bisa cu e promer biaha tabata mas o menos 5 aña pasa, Augustus 2020. E homber B. tambe a bisa cu e tabata cumpra for di L.T., kende sa trece p’e. E ta papia di cu 1 aña y 6 luna pasa, el a cuminsa y si e no haya L.T., e ta yama J.K. Segun B. a splica na Polis, cu tin biaha nan ta laga droga den su brievenbus.
E muhe J.K. a bisa Hues cu el a kere cu L.T. a fia hende placa y hende lo a deposita placa riba su cuenta. El a bisa cu e no conoce B. Segun L.T., B. ta un bisexual y e no kier pa su señora sa. L.T. a bisa cu B. tabata pidi’e pa busca bisexual p’e. Segun L.T., e tabata busca bisexual pa B. El a sigui bisa cu B. no tabata paga cash y L.T. tabata usa e cuenta di su pareha J.K. pa B. deposita placa.
Hues a mustra cu un tal C. y P. a papia di tabata cumpra droga for di L.T. Nan tabata manda mensahe via WhatsApp y L.T. tabata hiba droga pa nan. Segun P., e tin 10 aña ta cumpra for di L.T. y C. a papia di 5 aña tabata cumpra for di L.T. Hues a sigui bisa cu P. a reconoce J.K. como e muhe cu ta cu L.T. Hues a menciona diferente persona cu a bisa di a cumpra for di L.T. y J.K. Tur a bisa cu tabata manda whatsapp y L.T. tabata hiba e droga y si L.T. no por, J.K. ta hacie. Ta asina cu tanto L.T. como J.K. ta desmenti. Hues a remarca cu ta straño cu nan ta desmenti pero tin masha hopi hende ta bisa e mesun cos. Hues a remarca tambe cu por tin hende lo por ta gaña pero no tur.
Hues a mustra cu Polis a confisca placa y cosnan for di e cas. Tambe a confisca smartphone, y Hues a bisa cu segun e carchi di castigo di L.T., na 2023 L.T. a haya condena pa droga y a paga boet. J.K.a bisa Hues cu e tabata traha duro pa evita di ta na cas pasobra L.T. ta usa hopi droga.
Fiscal a baha pisa: Fiscal a bisa Hues cu investigacion a cuminsa na Mei 2025 y na Juni 2025 a haya informacion y a duna orden pa cuminsa investiga J.K. Na dado momento a para investigacion pasobra na Juni 2025 a haya pakete droga destina pa L.T. 575 pilder y 450 gram di Hash a keda confisca. Dia 1 Augustus 2025, a tene un razzia na un adres na Sabana Grandi, caminda a haya cantidad di droga, placa y smartphone na e cas. En total a confisca 62 gram di cocaina, 1,52 gram di cocaina haya den e tas di J.K. y den e caso a haya 54.24 gram MDNA. Tambe a confisca 2.242 Florin, 100 Euro y 600 Dollar.
Fiscal a bisa cu L.T. a admiti di cu e droganan el a importa for di Hulanda. Tambe e droganan na su cas, ta di dje. Pa loke ta bendemento di droga, L.T. ta bisa cu na 2019 el a bay Hulanda. Na December 2020 el a bay Hulanda y despues 2021 a bin bek. Segun Fiscal, tin 5 testigo cu a declara contra L.T. Cinco testigo a conta den detayes, con nan tabata cumpra for di L.T. Fiscal a bisa Hues cu e ta haya nan declaracion confiabel. Fiscal a conclui cu durante 4 aña L.T. tabata bende cocaina. Fiscal ta haya cu J.K. tabata bende droga durante 1 aña y 6 luna.
Pa cu e castigo, Fiscal a bisa cu bendemento di droga ta algo serio y ta causa hopi tristeza den famianan y ta crea hopi forma di criminalidad. Fiscal a exigi 5 aña di prison pa L.T. y pa J.K., 18 luna di prison di cual 6 luna ta condicional cu 3 aña di prueba. Fiscal a bisa cu e droganan a wordo destrui, e placanan lo keda confisca, tin smartphone cu lo wordo debolbi.
Abogado: mr. Canwood di L.T. a bisa cu L.T. a admiti di tabatin droga pero ta desmenti di a bende. Na opinion di abogado, L.T. a bisa cu e sa parti cocaina cu amigonan pero no tabata bende. Abogado a remarca cu ta papia di yamadanan y WhatsApp pero no tin raport riba esakinan. El a bisa cu e tin duda riba esakinan y no ta kere cu por papia di 4 aña manera Fiscal ta bisa.
E abogado a bisa cu e no ta haya cu tin declaracionnan cu ta mustra cu tabatin bendemento di droga sino posesion. E ta haya e castigo exigi pa Fiscal ta exagera.
mr. Kuster di J.K. a bisa Hues cu J.K. ta traha hopi duro. E tin dos trabao. E no tin nada di haci cu e droga cu a bin for di Hulanda. Apenas e ta na cas y tabata usa e cocaina como remedy pa dolor. Segun e abogado, L.T. tabata cu e auto y tabata hiba J.K. trabao y busk’e. For di WhatsApp y smartphone tin hopi combersacion pero por mira cu J.K. tabata papia cu amistadnan di salimento.
Ningun di e 3 smartphone cu a confisca di J.K., ningun a haya combersacionnan di droga. Segun mr. Kuster, e placanan confisca ta di J.K. cu e tabata prepara pa paga belasting riba cas. Segun mr. Kuster, Tambe e dollars tabata di tips di trabao. El a pidi Hues pa tene cuenta cu doño di trabao lo kier J.K. bek pero tur cos ta depende di decision di Hues.
Sentencia: Hues a sera tratamento di e caso y a pospone e caso pa asina evalua y merdia mes el a dicta sentencia. Hues ta haya tanto e homber L.T. como e muhe J.K. culpabel di posecion y bendemento di droga. Hues a confirma un parti di e exigencia di Fiscal.
El a condena L.T. na 4 aña di prison y e muhe J.K. na 18 luna di prison di cual 6 luna ta condicional cu un tempo di prueba di 2 aña. Hues a bisa sinembargo cu e 2.242 Florin lo keda confisca pero e 100 Euro y 600 Dollar lo wordo debolbe. Tambe Hues a bisa cu smartphone ta bay bek.
