E sospechoso ta para riba cu no tin prueba ORANJESTAD (AAN) – Z.C., y A.S. acusa riba 13 Juli 2020 a purba mata.
Posesion di arma di candela entre 22 Juli 2019 y 12 Augustus 2020. Ta asina cu Z.C. ta liber desde Februari 2021.
Fiscal ta acusa Z.C. y A.S. hunto di intento di asesinato door di tira riba cas di e homber H. Z.C. tabata di ayudo door di facilita un arma y auto. Tambe nan ta wordo acusa subsidiario, di menaza. Ademas nan ta wordo acusa di posesion di arma di candela entre 22 Juli 2019 y 12 Augustus 2020.
TIRA RIBA CAS
A.S. ta para riba cu e no a tira. El a bisa cu e no tabata den e auto y no tin video cu ta mustra cu e tabata den auto. El a bisa cu e tabata na cas drumi. Segun Hues 13 Juli 2020 anochi a tira riba H. y un amigo cu tabata na e cas na San Nicolas den un auto. A.S. a bisa Hues cu el a bisa Polis dia 22 Juli 2020 ora a detene, pa haci test di polvora riba su man, pero nan no a haci’e. Hues a bisa cu H. a declara cu el a mira un auto shinishi pasa y los tironan y core bay. Polis a mira impacto di bala riba e cas y hasta e glas di porta di cas a kibra.
A haya tambe un bala dilanti di e cas. A.S. a keda para riba cu e no a haci nada. Aunke cu Hues a mustra declaracionnan cu ta mustra cu ta A.S., e ta keda para riba cu e no a haci’e y pa mustr’e video cu ta mustra cu el a haci’e. Hues a splica A.S., cu no mester di prueba di video sino otro pruebanan tambe ta suficiente. Hues a mustra cu tin WhatsApp cu ta mustra cu un dama ta bisa cu un dia despues di e tiramento, A.S. a bisa cu el a pasa tira. Tin otro combersacion caminda e persona a bisa cu ta A.S. a bis’e di a tira riba nan. A.S. a bisa Hues cu e no ta usa cellular. Hues a keda asombra cu un hoben di 24 aña no ta usa cellular. Hues a remarca cu A.S. su tanta, su ex amiga y e amiga cu e tin yiu cun’e ta mustra cu A.S. ta usa cellular y e number cu tin e mensahenan ariba ta esun di A.S.
Hues mustra cu Z.C. promer tabata desmenti cu e number di cellular cu Polis a mustr’e tabata di dje pero despues a admiti. El a bisa Hues cu e tabatin un otro number promer y a cambi’e. Polis tin combersacion di Z.C. na cellular graba. Riba 22 Juli 2020 tin un combersacion caminda Z.C. a bisa cu net tabatin investigacion na un cas y Polis no a haya e “gun”. Z.C. a bisa Hues cu e arma no ta di dje. El a bisa cu el a fia A.S. 1600 florin, cu el a pidi su oma, pero e no tabata sa cu A.S. a bay cumpra un arma. E tabata papia cu e tanta di A.S. y a bisa cu e arma ta bon scondi y e tanta a bisa cu e no kier cu Polis ta bolbe bay haci investigacion.
Na dado momento Z.C. a bisa cu e ta busca su arma bek. Z.C. den Corte a bisa Hues, cu te dia di awe e no a haya e 1600 for di A.S. El a splica Hues cu el a fia hende placa keriendo cu A.S. lo bay drecha auto pero a bay cumpra arma cu esaki. Pesey el a expresa dun’e su placa of e arma. Z.C. a reconoce den un combersacion entre e y A.S. mientras cu A.S. ta bisa cu e no tabata papia na cellular. El a bisa cu un tal Carlito a bis’e cu A.S. lo a tira riba e cas. Segun Z.C., el a puntra A.S. pero A.S. a desmenti esaki.
Fiscal a mustra cu tin un combersacion 11 Juli 2020 caminda A.S. a bisa Z.C. cu nan a tira riba dje y cu e lo bay mata un hende y cu e ta bay busca Z.C. Segun Z.C., no tabata asina cu a tira riba e cas di H. El a bisa cu A.S. a bay serca su amiga. A.S. a pidi’e pa huur e auto. E ora ey Z.C. a huur e auto di su oma na A.S. El a bisa Hues cu e no a huur e auto pa A.S. bay haci cos robez cu e auto.
Hues a mustra cu a haya den un cellular diferente potretnan di arma di candela y hasta un potret di A.S. cu cara tapa y un arma den man. Segun A.S. esey ta potretnan di 2014. Ta asina cu A.S. den pasado a yega di wordo condena pa arma di candela.
EXIGENCIA FISCAL
Fiscal a bisa cu Hues cu e investigacion aki a cuminsa durante un otro investigacion cu ta dedica na esnan cu ta atende cu armanan di candela. Na dado momento a scucha un yamada 11 Juli 2020 di A.S. kende a pidi un persona 4 bala pasobra e tin problema cu otro persona. E combersacion ta sigui bisa cu nan a tira riba dje y cu e lo bay mata un hende. Dos dia despues tabatin tiramento riba un cas den oranan di anochi. Investigacion ta mustra cu e arma lo ta un revolver Cal. 38 Fiscal ta haya legalmente proba cu A.S. a tira.
El a mustra cu tin problema entre H. y A.S., kende lo a dal A.S. cu un arma den cara dilanti A.S. su yiu. Tin combersacion graba caminda A.S. lo a bisa cu el a tira riba cas di H. Fiscal a mustra cu tin mas combersacion 14 Juli 2020 caminda A.S. lo a bisa cu el a tira riba nan y cu mester sconde e arma. E otro persona a confirma cu A.S. a bis’e asina. Mustra riba un combersacion entre Z.C. y A.S. algun ora despues di e tiramento caminda A.S. ta bisa Z.C. pa sconde e arma.
Fiscal ta haya cu tin suficiente prueba cu A.S. a tira riba e cas. E auto cu A.S. a usa pa tira riba e cas ta e auto di oma di Z.C. Tin imagennan di video di seguridad caminda ta mira e auto ta core varios biaha ey banda. Z.C. a bisa cu el a huur e auto na A.S. y tabata sa masha bon kico A.S. tabata bay haci. A haya 7 diferente potret di arma riba cellular di A.S.
NO PROBA INTENTO ASESINATO
Fiscal no ta haya proba intento di asesinato pa A.S. y Z.C. y tampoco intento di mata. Na opinion di Fiscal, e tironan tabata na halto y esnan den cas tabata den un camber cu no ta cerca di e impactonan di bala. Fiscal si ta haya proba, cu A.S. a menaza y posesion di arma di candela. Fiscal no ta haya proba cu Z.C. ta complice. Si e ta haya Z.C. culpable di complicidad di arma y auto cu a facilita A.S. Considera A.S. residivista. Z.C. ta menor di edad y lo aplica castigo hubenil.
CASTIGO
Pa cu e castigo, Fiscal ta considera A.S. residivista. Pa loke ta Z.C., e ta menor di edad y lo aplica castigo hubenil.
Fiscal a exigi pa A.S. cu ta blo keda desmenti, 3 aña di prison y pa Z.C. 360 dia di prison di cual 168 dia ta condicional cu 2 aña di prueba y bou guia di Reclasering. Fiscal a bisa cu e auto confisca por bay cerca e oma. Hues a bisa cu e ta bay studia e caso y despues lo dicta sentencia.
