ORANJESTAD (AAN) – Manera DIARIO a publica, Ministerio Publico hunto cu Corte di Husticia a planea dianan pa asina trata e cantidad di casonan penal cu Ministerio Publico a cuminsa contra 36 hende cu a viola e Toque de Queda.
DIANAN SPECIAL PA E CASONAN
Informacion cu DIARIO tin ta mustra cu Ministerio Publico hunto cu Corte a planea dos dia e luna aki pa asina trata e casonan. Mirando e cantidad di hendenan, na Corte di Husticia a planea dos dia separa e luna aki for di e dianan di casonan penal, pa asina atende e casonan aki.
Manera ta conoci, Ministerio Publico a duna un periodo pa asina esnan cu kier paga e multa di 1000 florin, por paga esaki. Hopi biaha, teniendo cuenta cu e situacion actual, por yega na un areglo di pago. Door cu tin hendenan no a bay Ministerio Publico pa paga, awor Ministerio Publico ta cuminsa un caso penal contra nan.
VIOLA 7 BIAHA
Ta asina cu tin un cantidad di e hendenan ta wordo persigui caminda nan a viola e toque de queda mas cu un biaha. Tin un di e personanan su nomber ta aparece 7 biaha pa violacion di e toque de queda. Tin un otro cu a viola 4 biaha, tin un otro cu a viola 3 biaha, mientras cu tin varios cu a viola e toque de queda 2 biaha.
PONE SALUD NA PELIGER
Recientemente den un caso di droga, tabatin un di e acusadonan cu tambe a wordo persigui pa viola toque de queda. Hues den su evaluacion di e caso a bisa cu e ta tene cuenta cu esnan cu ta viola e toque de queda ta poniendo salud di henter un comunidad na peliger.
Den mayoria di e casonan di viola toque de queda, Hues di Corte di Husticia ta tene debido cuenta cu e situacion actual cu e pandemia Covid ta causando caminda un gran cantidad di hende ta sin trabao. Envez di castigo di 1000 florin di multa, tanto Ministerio Publico como Corte di Husticia a opta pa duna castigo di trabao pa comunidad.
Lo ta interesante pa sa con Ministerio Publico y Hues di Corte di Husticia lo bay actua riba esnan cu a viola e toque de queda mas biaha.
