Abogado mr. Mohamed den Corte
ORANJESTAD (AAN): Diabierna practicamente henter mainta Hues di Corte di Husticia a dedica na tratamento di e caso penal cu Ministerio Publico a cuminsa contra e homber B.P. Fiscal ta haya B.P. culpable di tabata maltrata formal, menaza cu arma y viola violento su amiga.
Fiscal a exigi 6 aña di prison. E homber B.P. a bisa Hues cu awor e ta realiza cu cierto cosnan cu el a haci no tabata bon. E ta para riba cu e no a forza e dama K. haci nada y cu tur cos a sosode cu permiso di e dama K.
Abogado mr. Mohamed ta haya cu K. mes, despues di a haci denuncia, a bay pidi pa hala e denuncia aden pasobra e no kier pa B.P. ta sera. El a bisa cu ta bou presion di famia el a bay haci denuncia. E ta haya cu e 6 luna cu B.P. ta encarcela, ta suficiente castigo y no e 6 aña di prison cu Fiscal ta exigi.
Den e articulo aki, DIARIO ta publica e defensa di e abogado, mientras cu tratamento di e caso ya a sali publica.
DAMA MES TABATA KIER MALTRATO
Mr. Mohamed a bisa Hues cu B.P. tin su señora y tabatin relacion cu K. El a bisa cu K. a duna declaracion detaya riba dianan 7,8,14 Januari 2022, di su relacion cu B.P. y a pinta B.P. como un monster. Ta parce cu ta B.P. tabata domina K. su bida.
E abogado a bisa Hues cu B.P. a declara y den Corte a admiti di a haci cosnan cu no tabata bon, pero ningun momento el a forza K. di tin relacion sexual brutal.
Mr. Mohamed a mustra cu dia 16 Februari 2022, K. a manda un carta pa Ministerio Publico, caminda e ta hala su declaracionnan aden. K. a bisa cu el a wordo forza door di famia pa haci denuncia. El a bisa cu e no a wordo forza door di B.P.
Relaciona cu esaki, Polis a interoga K. riba 28 Maart 2022, caminda el a bisa cu su consenshi ta remorde. K. a bisa Polis cu e y B.P. a palabra pa tin sex brutal y cu K. tabata conciente cu e lo por keda cu marcanan.
Mr. Mohamed a menciona diferente sentencia di Corte Supremo pa mustra cu den e caso aki no por papia di maltrato severo manera Fiscal ta bisa. El a bisa cu di acuerdo cu e sentencia di Corte Supremo, si e victima a haya tratamento medico y remedy, e ora por papia di maltrato severo. Esey no tabata e caso cu e dama K. El a bisa cu K. mes a bay di acuerdo pa B.P. haci tattoo riba dje.
E abogado a bisa cu no por papia di violacion pasobra K., a bisa cu e no a wordo obliga pa tin relacion sexual. El a mustra cu psicologo ta mustra cu B.P. ta responsible pa su actonan. Tambe psicologo ta mustra cu B.P. mester di tratamento. E abogado a bisa Hues cu ya B.P. tin 6 luna sera. E abogado ta haya cu ya B.P. a sinta suficiente castigo y pa laga B.P. haya libertad pa asina e cuminsa cu e tratamento manera psicologo a bisa.
Hues, despues di a scucha mr. Mohamed, a sera tratamento di e caso y a bisa cu 29 Juli 2022 pa 1’or di merdia lo tin sentencia.
