Awor mester cuminsa caso pa sa kende realmente ta doño di oro
ORANJESTAD (AAN): E hombernan Venezolano biba na Aruba, R.G.Z. y J.T.R., riba Diahuebs mainta a worde declara liber di e acusacionnan di falsificacion y labamento di placa, relaciona cu e 55 baranan di oro cu a keda confisca na aeropuerto.
Fiscal a exigi pa G.R.Z. castigo igual na loke e tabata sera mientras cu pa J.T.R. el a exigi 12 luna di prison di cual 6 luna ta condicional cu 2 aña di prueba.
Fiscal: Luna pasa tratamento di e caso a tuma lugar caminda Fiscal a bisa Hues cu J.T.R. y G.R.Z. ta esnan cu a transporta baranan di oro den maletanan simpel. E oro ta bin for di Venezuela sin documento drechi. For Curacao ta manda Douane documentonan y ta aproba esaki.
Na opinion di Fiscal, tur cos ta mustra cu e oro ta procedente di Aruba, siendo cu e ta procedente di Venezuela. Esaki ta e parti falsifica riba documento.
Na opinion di Fiscal, Douane di Aruba inconciente tabata coopera cu esaki. E ta haya cu aki por papia di labamento di placa intencional. Fiscal pa cu e castigo, a tene cuenta cu e tempo cu a transcuri. El a exigi pa G.R.Z. castigo igual na loke e tabata sera. Pa J.T.R. el a exigi 12 luna di prison di cual 6 luna ta condicional cu 2 aña di prueba.
Sentencia: Diahuebs mainta Hues den su sentencia a bisa cu e ta rechaza defensa cu tabatin persecusion delibera riba e duo Venezolano y cu tabatin un proceso inhusto.
No tin falsificacion: Pa loke ta e acusacion di falsificacion di 2 documento, Hues ta haya cu e documentonan ta di Douane y no ta haya cu ta falsificacion. Tambe Hues no ta haya proba cu lo kier a sconde cu e oro ta procedente di Venezuela cu e documentonan aki. Hues a mustra cu ta via broker e documentonan ta worde manda pa Douane caminda ta para cu e oro ta procedente di Venezuela y ta worde exporta pa otro pais.
Na Aruba G.R.Z. a bay Douane pa tuma e documentonan caminda e oro tabata tey caba.
Hues ta haya cu Douane a splica cu e yenamento di formulario ta corecto y Douane di Hulanda tambe ta yena mesun cos o sea cu na Aruba ta pone cu e oro ta procedente di Aruba y na Hulanda ta pone cu e oro ta procedente di Hulanda. Hues ta haya cu aki no por conclui cu esaki ta pa gaña y no bisa cu e oro ta procedente di Venezuela. E ta haya cu Douane no tabata corecto den su informacion riba e documentonan. Hues a declara e duo liber di falsificacion di documentonan.
No tin labamento di placa: Pa loke ta e acusacion di labamento di placa, Hues a mustra cu e sospechosonan G.R.Z. y J.T.R. ta para riba cu via ‘Pa Oro International’ nan tabata transporta e oro pa destinacion. Hues ta haya cu e solo hecho cu e oro ta di Venezuela, no corecto ta saca conclusion cu e ta procedente di delito.
No tin prueba concreto cu e oro ta ilegal y mucho menos di delito. E forma con a transporta e baranan di oro, no por papia di sospecho di oro ilegal. Hues a declara e duo G.R.Z. y J.T.R. liber di e acusacionnan.
Por a mira e momento ey cu emocionnan tabata halto den sala di Corte y e persona J.T.R. a cuminsa yora di alegria, reflexionando riba tur e cosnan cu el a pasa aden.
No a dicidi riba e baranan di oro: Pa loke ta e baranan di oro, cualnan ta hinca den un caha fuerte na Banco Central di Aruba, Hues a bisa cu e no ta tuma un decision riba esakinan. El a bisa cu no tin indicacion, kende ta e doño di esakinan.
Esaki ta nifica cu awor lo bay tin un otro caso den Corte caminda e compania cu a cumpra e oro for di un compania na Venezuela, mester demostra cu e ta e doño real di e oro. DIARIO por a compronde cu esaki lo por bira un proceso cu lo dura un tempo.
