E sospechoso mes a admiti di a realisa cu el a haci malo
ORANJESTAD (AAN): Diabierna practicamente henter mainta Hues di Corte di Husticia a dedica na tratamento di e caso penal cu Ministerio Publico a cuminsa contra e homber B.P. Fiscal ta haya B.P. culpable di tabata maltrata formal, menaza cu arma y viola violento su amiga.
Fiscal a exigi 6 aña di prison. E homber B.P. a bisa Hues cu awor e ta realiza cu cierto cosnan cu el a haci no tabata bon. E ta para riba cu e no a forza e dama K. haci nada y cu tur cos a sosode cu permiso di e dama K.
Abogado mr. Mohamed ta haya cu K. mes, despues di a haci denuncia, a bay pidi pa hala e denuncia aden pasobra e no kier pa B.P. ta sera. El a bisa cu ta bou presion di famia el a bay haci denuncia. E ta haya cu e 6 luna cu B.P. ta encarcela, ta suficiente castigo y no e 6 aña di prison cu Fiscal ta exigi.
Den e articulo aki, DIARIO ta publica tratamento di e caso y exigencia di Fiscal. Den un otro articulo, DIARIO ta publica e punto di bista di abogado mr. Mohamed.
ADMITI CU TIN COSNAN NO TABATA BON
Promer cu Hues a repasa e relato di Polis, el a puntra B.P. si e acusacionnan ta cuadra. B.P. a bisa Hues cu e ta casa y tabatin e amiga K. Segun B.P., nunca el a falta respet pa K. y cu nan tabatin amor profundo. El a bisa cu nunca a obliga K. haci cosnan cu K. mes no tabata kier. Awor e ta realisa cu el a haci cierto cosnan cu ta contra di ley. El a bisa cu tur e cosnan cu el a haci tabata cu aprobacion di K.
DAMA MALTRATA CU SKIN UP
Hues a mustra cu segun e relato di Polis, dia 7 Januari 2022, Polis a bay na un cas na Sero Preto, caminda lo tin un homber para dilanti cas cu arma. Polis a papia cu mama di K., P. E mama a bisa cu K. tin un relacion cu B.P. y cu el a wordo viola varios biaha. El a bisa cu e dia ey K. a bis’e cu B.P. a menace di lo kap tres biaha. Segun P. den pasado caba B.P. a menaza su yiu K. cu arma. Door cu el a mira B.P. den auto dilanti cas, el a pensa cu B.P. lo tabatin arma. Despues di busca den vecindario, Polis a detene B.P. pero no a haya arma. E dama K. a bay haci denuncia y duna declaracion hopi detaya pero despues ta hala declaracion aden y despues duna otro.
- a bisa cu e tin 2 aña di relacion cu B.P. E casa di B.P. sa cu K. tin un relacion cu B.P. El a bisa cu B.P. a exigi cu cada 15 minuut K. mester informa B.P. via whatsapp unda e ta, saca potret y location. El a bisa cu B.P. a maltrat’e cu un skin up un biaha y constantemente B.P. ta maltrat’e. Ta asina cu B.P. a instala un sistema den e cellular di K. cu e sa cada rato unda K. ta. E dia ey B.P. a kibra relacion y K. a bisa cu e no por mas cu e relacion aki. K. a conta su prima W. kico tur a pasa. E prima a hiba K. na un cas pa K. no keda su so. Na dado momento B.P. manda whatsapp bisa cu K., cu K. lo ta cu un otro homber. E momento ey B.P. a bay na cas di K. E mama di K., a bisa K. cu B.P. ta dilanti cas.
DAMA ABUSA FORMAL
Segun K., B.P. a yega di menace cu arma di candela y pone na su cara. Segun K. e tin hopi miedo ora B.P. saca arma. K. ta traha como enfermera na un lugar. Un homber hoben a pidi’e ayudo. K. den su spanto, a kita e apps cu B.P. a instala pa control’e. B.P. a reclam’e pa esaki y K. a bis’e ta un patient a yam’e. B.P. a bay cu K. na un apartamento y a abusa di dje formal di patras. E cama a keda tur na sanger. Segun K. e no por bisa B.P. nada sino e ta wordo maltrata. El a wordo hiba hospital y B.P. a yama su seָñora pa bay hospital pa ta cu K. Na hospital K. a gaña kico realmente a pasa, pa scapa cu B.P. lo wordo deteni.
KITA DOS DIENTE DI DAMA
Segun declaracion di e dama K. haci na Polis, entre October 2021 y November 2021 den apartamento, el a bolbe wordo maltrata. E biaha aki B.P. a chok’e y despues primi na su cara asina duro cu dos djiente di K. a cay for di su boca.
MALTRATONAN FORMAL
E dama K. a declara na Polis cu aña pasa tambe B.P. a maltrat’e cu un skin up. Segun K., B.P. a dal’e cu e skin up na su cabez y hasta a mord’e. Segun K. e mester tene relacion sexual cu B.P. sino e lo wordo maltrata. K. a bisa cu 20 biaha B.P. a dal’e cu un slang diki na su curpa. K. a keda cu sicatriz na su curpa. Tambe K. a bisa cu B.P. ta un artista di tattoo y cu B.P. a tattoo su nomber riba diferente parti di curpa di K. Segun K., hasta riba su parti intimo B.P. a tattoo. B.P. a tattoo su nomber Billy pa mustra cu K. ta su propiedad.
Ora cu Hues tabata mustra unda tur K. a wordo tattoo, por mira cu K. tabata yora.
DAMA MARA Y ABUSA
Hues mustra cu K. a declara tambe na Polis cu B.P. tabata mare y abusa di dje. Cada vez K. tabata bis’e cu e ta haci’e dolor pero B.P. tabata sigui. Segun K. e tabata sinti’e forza pa tin relacion sexual brutal cu B.P. Segun K. e tin miedo di conta con B.P. ta trat’e pasobra B.P. lo mat’e. Door di tur e maltratonan y menazanan K. su confianza den su mes no tey mas.
Segun K. e mester haci tur loke B.P. bis’e sino e ta wordo maltrata. E tabata tene relacion sexual contra su voluntad pero no tabata reclama door di miedo. Polis a confisca 2 cellular y for di esakinan por constata potretnan di K. cu e tabata manda pa B.P. y “voice note” di B.P. cu ta mustra cu e ta hopi jaloers.
VICTIMA A HALA DENUNCIA ADEN
Hues a bisa cu 14 Februari 2022, tabata e ultimo declaracion cu K. a haci na Polis. Ta K. mes a bay haci denuncia. Despues K. kier a hala su denuncia aden.. Dia 16 Februari 2022, K. a manda un carta pa Ministerio Publico caminda e kier hala su denuncia di 7 Januari 2022 contra B.P. aden. El a bisa cu e tabata bou presion pisa di su famia y asina el a haci denuncia contra B.P. El a bisa cu nunca B.P. a viol’e y cu tur cos a bay cu su aprobacion. El a bisa cu e kier e relacion cu B.P. caba pero no cu B.P. ta sera. Segun K. e ta bou tratamento di psicologo.
Hues a mustra cu na Hues Comisario K. a declara cu ta cu su aprobacion B.P. tabata maltrat’e. El a bisa cu si e haci malo, e ta wordo maltrata. El a bisa cu esey ta su pago. Segun K. tur e cosnan cu a sosode, tabata un forma di wega. Segun K., ta su mama y famia a bin cu un complot pa e no ta cu Billy.
SOSPECHOSO TA ADMITI
B.P. mes a declara na Polis cu e no ta confia K. y nan a palabra cu cada 15 minuut, K. mester raporta. El a admiti di menaza K. cu un air gun cu ta parce un arma di berdad. E tabata sa cu K. ta un patient psychiatrico. B.P. a admiti di a maltrata K. cu un slang. Segun B.P., ta K. mes a pidi pa e tattoonan. El a bisa tambe cu e sa cu el a haci cosnan cu ta contra ley. B.P. tabata huur un apartamento caminda e tabata tene relacion sexual cu K. Segun B.P., un di e castigonan cu el a duna K., ta hinca mokete completo den su atras.
Segun B.P., cada biaha cu K. gaña of haci cosnan cu e no ta permiti di haci, e ta haya castigo. B.P. a admiti na Polis cu el a bay di mas cu maltrato cu slang. El a bisa cu e tabata maltrata K. cu slang, pa K. papia e berdad. El a choca K. ora e tabata haci pregunta. El a admiti cu den auto, el a dal K. cu skin up. Tambe cu el a usa teaser riba K. pa e bisa e berdad. Segun B.P., nunca el a forza K. pa tin relacion sexual. El a admiti cu ora el a primi K. su cara, un djiente a cay. El a bisa cu el a menaza K. cu un air gun cu ta parce un arma di candela. Tambe cu K. a cuminsa pishi y perde conocimento. Tambe cu el a bisa K. cu e tin un bala cayente cu nomber di K. ariba.
SADISTA SEXUAL
Psicologo ta considera B.P. un sadista sexual cu ta un “parafiele stoornis”. Esaki B.P. ta haci pa satisfase su mes sexual. Pero e accionnan aki ta causa molester na e pareha. Psicologo ta mustra cu B.P. semper e kier surpasa e limite. B.P. ta usa steroid di mas. B.P. tin dificultad pa reconoce su impacto riba otro. E sa kico ta bon y kico ta malo.
Psicologo ta haya cu B.P. ta completo responsabel pa su actonan. El a mustra cu e chens ta grandi cu B.P. lo bolbe sigui haci’e. E ta haya cu B.P. mester tratamento obligatorio pero no den un lugar.
FISCAL
Fiscal a bisa Hues cu e ta haya legalmente proba cu B.P. a abusa di K. y maltrat’e. Fiscal a bisa cu K. ta enamora di B.P. pero tin hopi miedo di B.P. Mustra cu K. a duna declaracion detaya con B.P. tabata abusa y maltrat’e y cu e ta cansa di tur esaki y no por mas. Segun K. e no por a dicidi nada. E tattoonan cu B.P. a pone riba dje e no tabata kier. E no ta permiti bay ningun caminda. E mama di K., famia di K. a declara cu K. tabatin hopi miedo di B.P. y cu K. tabata wordo maltrata door di B.P.
Fiscal a mustra cu B.P. mes a declara cu e tabata maltrato K. ora K. gaña. El a admiti di a menaza K. cu un air gun. El a maltrata K. cu un slang, skin up, primi na cara te cu djiente a cay. B.P. ta bisa cu e no a forza K. pa haci tattoo. El a bisa cu e tabata mara, maltrata K. y despues ta tene relacion sexual. Fiscal ta haya cu aki no por papia di tin relacion sexual voluntario. E ta haya cu B.P. tabata domina y controla K. y pesey a pone su nomber tattoo riba K. Despues K. kier hala denuncia aden. Pero esey no ta haci cambio den e caso. Cuater biaha K. a declara con el a wordo viola, maltrata y obliga door di B.P. Fiscal a bisa cu K. tabata asina bou di dominio di B.P., cu e kier keda cu B.P. Awor K. ta sinti cu ta door di dje, B.P. ta sera. El a hala su denuncia aden pa asina B.P. por ta liber pasobra e kier B.P. Fiscal a mustra cu K. no a bisa cu e cosnan cu a sosode no ta berdad pero cu e mes tabata kier. Na opinion di Fiscal, esey no ta kita afor cu B.P. ta castigabel.
CASTIGO
Fiscal ta haya cu premedita B.P. a maltrata, viola, menaza e dama K. Psycologo ta mustra cu B.P. ta responsabel pa loke el a haci. Segun Fiscal, Corte Supremo, haci tattoo di e forma aki ta wordo considera como maltrato severo. E marcanan cu K. tabatin di e maltrato por wordo considera como maltrato severo.
Fiscal ta haya cu B.P. tabata domina y controla K. Loke e kier, e tabata haci cu K. El a marca K., cu tattoo di su nomber. Fiscal a bisa cu e no ta haya na su lugar un castigo combina. E no ta haci husticia pa e seriedad di e caso. El a exigi 6 aña di prison.
Hues, despues di a scucha mr. Mohamed, a sera tratamento di e caso y a bisa cu 29 Juli 2022 pa 1’or di merdia lo tin sentencia.
