Hues a tuma e acusado na malo pa loke el a haci
ORANJESTAD (AAN): Diabierna mainta Hues a bisa cu e ta haya e homber Jean Pierre Croes di 37 aña, culpabel di intento di mata dos persona durante un momento di teror na un cas na Parkietenbos y despues riba tereno di compania na Ser’i Tijsji, unda a combina ladronicia cu violencia. Hues a condena Croes na 7 aña di prison, mescos cu loke Fiscal a exigi.
Fiscal: Tratamento di e caso a tuma lugar 19 April 2024 caminda Fiscal a bisa cu diferente persona a bira victima di Croes. Na Parkietenbos, Polis a haya 2 victima homber caminda F.S. tabata den e cas hopi herida mientras cu A.C. tabata na un cas eybanda. F.S. a wordo hiba cu ambulance pa hospital. A haya Croes na ATCo full sunu. Fiscal a bisa cu e comportacion di Croes tabata pone Polis pensa cu e lo tabata bou influencia.
Fiscal a bisa Hues cu F.S. a sufri hinca na garganta, schouder y pia. El a sufri fractura na craneo, fractura na ribchi. E mester a keda interna den hospital. A.C. tambe a sufri heridanan y fractura y mester a keda interna. Na opinion di Fiscal, por conclui cu Croes cu un cuchiu y biga a maltrata F.S. Fiscal ta considera esaki intento di mata. Na ATCo tabatin confrontacion entre empleadonan cu Croes, pasobra e kier a horta dos truck.
Fiscal a bisa cu psicologo ta haya cu Croes tin problema mental door di uso di substancianan. Psicologo ta bisa cu J.C. ta menos responsabel pa su actonan. Fiscal a bisa cu e ta pidi pa declara J.C. liber di e acusacion di ladronicia for di un cas. Fiscal a exigi 7 aña di prison pa Croes. Pa loke ta e demanda di daño material, Fiscal ta compronde loke F.S. a pasa aden. Pero e ta pidi pa declara e demanda no admisibel pasobra e no ta specifica. Pa loke ta e demanda di A.C., el a mustra cu recibo di hospital di cobranza di 8.500 florin, ta aceptabel.
Sentencia: Hues a bisa cu no a keda proba e ladronicia y ta declara Jean Pierre Croes liber di esaki. Hues a bisa cu e ta haya legalmente proba tur e otro acusacionnan. Hues a bisa cu J.C. a dal F.S. cu biga y a hinca cu cuchiu. E victima mester a wordo cosi y a keda cu cicatriz. Esaki ta haci cu mester cualifica esaki maltrato severo. No por papia di ladronicia di dos truck na ATCo. Hues a bisa cu J.C. a bisa cu el a haci esey pa haya atencion.
Pa cu e castigo, Hues a bisa cu e ta tene cuenta cu Croes a haci su mes culpable di un serie di delitonan serio. A purba mata un ciudadano (63) door di dale cu biga na cabez y e ciudadano (73) cu a bay yuda e homber cu a wordo maltrata severamente. A purba bay cu dos truck di ATCo. E victimanan a keda afecta di e maltrato di recidivista Jean Pierre Croes. Hues ta haya cu Croes su forma di actua ta mustra cu e no tin respet pa pertenencia di hende. Hues a tuma Croes na malo pa tur esaki.
Hues a sigui bisa cu e ta tene cuenta cu raport di psicologo cu J.C. door di uso di droga y alcohol ta bira hopi agresivo. Psicologo ta haya Croes menos culpable di su actonan. Hues tambe a menciona cu dos aña pasa, Jean Pierre Croes a wordo condena pa tipo di casonan igual.
Castigo: Hues a bisa cu e demanda di daño di A.C. di 8.416 florin, e ta aproba y Jean Pierre Croes mester paga. Hues a bisa cu e ta pone medida di pago cu ta encera cu si Croes no paga, e lo bay sera. E otro demanda lo wordo declara no admisibel y por cuminsa un caso civil.
Hues a condena recidivista Jean Pierre Croes na 7 aña di prison mas, e parti condicional cu tabata colga riba cabez di dje pa un delito cu el a haci anterior. Riba e potret por mira e cas unda el a comete e actonan baho di ataca dos persona di edad grandi.
