Hues a confirma exigencia di Fiscal
ORANJESTAD (AAN): E homber G.C. (29), ayera mainta a scucha Hues bisa cu e ta culpabel di intento di mata y a conden’e na 6 aña di prison, mescos cu Fiscal a exigi.
FISCAL A EXIGI 6 AÑA DI PRISON
Tratamento di e caso a sosode 26 April 2024 caminda Fiscal a bisa cu den oranan tempran di mainta, 6’or, 1 Januari 2024, Polis a bay na pomp di gasoline den Caya Betico Croes caminda e homber S. a bisa cu banda di e ex pomp di gasoline den Klip na lagoen, C.G. a tira riba su auto cu un revolver. Departamento Tecnico a haci investigacion riba e auto y a constata un impacto di bala door di e windshield di patras. Segun S., e y su pareha M. a bay pa papia cu G.C. y a mira G.C. saca arma.
El a dicidi di core duro bay y a scucha un sonido y sinti algo pasa banda di dje. Segun e amiga di S., M., el a mira con G.C. a saca un arma color preto y tira riba e auto y a scucha con e windshield patras a kibra.
Polis a busca imagennan di video di seguridad den vecindario. Polis a desarma e dashboard di e auto caminda a mira un buraco di bala y a haya un bala. Tambe Polis a haya glasnan kibra riba e caminda dilanti di e cas. E glasnan aki ta di e auto riba cual a tira. Fiscal a bisa cu e chatnan riba Instagram, ta riba peticion di abogado mr. Carlo a haci esaki pero G.C. mes no kier a duna autorizacion pa haya e chatnan. Na opinion di Fiscal, e chat ta mustra cu S. ta hopi spanta di G.C. Fiscal a conclui cu G.C. ta culpable di intento di mata y posecion di arma. Fiscal a bisa cu tiramento ta causa trauma y G.C. mester ta gradici cu e pareha den e auto no a wordo alcansa door di bala.
Fiscal a mustra cu tin hopi caso di tiramento riba Aruba. El a bisa Hues cu Ministerio Publico no kier pa Aruba bira un Wild Wild West. Fiscal a exigi 6 aña di prison pa G.C.. Fiscal a bisa cu e placa y 5 brommer cu a haya na e cas lo mester keda confisca.
El a bisa Hues cu autoridad di Aruba a cuminsa un investigacion riba e 5 brommernan y piezanan cu lo por ta procedente di Hulanda caminda brommernan a wordo horta na diferente parti.
SENTENCIA
Diabierna mainta Hues a bisa cu e ta haya legalmente proba cu riba 1 Januari 2024, G.C. a purba mata e pareha S. y M., door di a tira den nan direccion. Esaki ta intento di mata. Tambe cu G.C. tabata den posecion di arma di candela. Hues a bisa cu defensa a presenta un scenario otro cu ta e homber S. a tira riba su mesun auto y laga haci cu ta manera G.C. a hacie. Hues ta haya cu no tin suficiente prueba pa mustra cu e scenario alternativo, lo ta real.
Hues a bisa cu no tin motibo pa duda den declaracion di e denunciantenan. Hues a bisa G.C. cu ora tira riba un auto caminda tin hende sinta, ta tuma riesgo cu e hendenan por muri. Esey ta intento di mata y posesion di arma di candela.
Pa cu e castigo, Hues a bisa cu e ta tene cuenta cu, net riba aña nobo den Klip, G.C. a tira riba un auto. A pone bida di hende den peliger. Na opinion di Hues, loke G.C. a haci ta causa sentimento di inseguridad. Hues a bisa cu posesion di arma di candela ta hopi serio y ta causa inseguridad den comunidad.
Pa loke ta e beslag cu Fiscal a laga haci, Hues ta haya cu no por tuma brommernan pa un otro investigacion cu mester haci. Hues ta haya cu Fiscal lo mester bin cu un otro beslag.
CASTIGO
Hues a condena G.C. na 6 aña di prison, kitando e tempo cu e ta sera. Hues a ordena Fiscal cu tur loke a wordo confisca mester wordo duna bek.
