Huez a bisa pareha condena pa asalto arma
ORANJESTAD (AAN): E homber S.W. di 19 aña y e muher E.A. di 21 aña, recien a worde sentencia pa asalto arma na He Market na Monserat na Noord.
Hues despues di a bisa su sentencia a avisa e pareha si tin pensa pa bay apela, tene cuenta cu Hof lo bay baha hopi mas pisa pa asalto arma.
Asalto arma na supermercado: Hues den su sentencia a bisa cu e ta haya legalmente proba cu S.W. y E.A. hunto a haci asalto arma na e supermercado na Monserat riba Dialuna anochi 16 November 2020 pa 7:55 pm.
Ta asina cu E.A. a keda sinta den auto pa stuur mientras cu S.W. y e homber M.W. a baha pa haci e asalto. A haci uso di un arma di candela falso.
Complice di asalto: Hues a mustra cu e no ta kere ponencia di abogado cu e dama E.A. no ta complice.
Na opinion di Hues, E.A. a yuda planea e asalto arma y a core e auto. El a mustra cu nan a bay hunto cas di M.W., parti placa y despues a bay huur apartamento y keda hunto y a cumpra cuminda.
Hues a bisa cu e no tin ningun motibo duda den declaracion di S.W. y M.W., kendenan a bisa cu ta E.A. a bisa nan pa haci e asalto. Durante tratamento di e caso a worde mustra cu E.A. a bisa S.W. y M.W. cu ta gaynan di caya nan ta tog, haci pa mustra cu nan ta gaynan di caya. Door di presion di E.A. nan a dicidi di haci e atraco arma.
No duna castigo hubenil: Hues a mustra cu asalto arma ta un asunto hopi serio na Aruba. Aunke cu e arma no ta di berdad, e victima no sa. Asalto arma ta afecta turismo di Aruba.
El a bisa cu victima di asalto arma por keda traumatisa.
Pa cu e castigo, Hues a bisa cu e ta tene cuenta cu e edad jong di e pareha. Hues a bisa cu e ta rechaza e peticion di abogado pa usa castigo hubenil pa S.W. (18).
Cuarenta luna di prison: Hues a condena tanto S.W. como E.A. na 40 luna di prison di cual 12 luna ta condicional cu un tempo di prueba di 2 aña. Esaki bou guia di Reclassering.
Hues tambe a bisa cu nan mester paga daño na He Market cu ta 1.000 Florin cu nan a coy for di e cash register.
Pensa bon si ta apela: Hues a mustra cu e pareha tin chens di apela e sentencia. El a avisa e pareha pa pensa bon si ta bay apela. El a bisa cu Hof ta hopi mas pisa den castigo especialmente ora ta trata di casonan di asalto arma.
