Abogado mr. Croes
ORANJESTAD (AAN): Diabierna mainta, pa oranan largo a trata e caso di un mama acusa di a abusa di su dos yiunan, un muher y un homber. Fiscal a haya e sospechoso muher R. culpable y a exigi 4 aña di prison.
Den e articulo aki, DIARIO ta concentra riba e defensa di abogado mr. D. Croes, mientras cu den un otro articulo anterior a publica tratamento di e caso y exigencia di Fiscal.
Sospechoso ta desmenti: Abogado mr. D. Croes, despues di a scucha exigencia di Fiscal, a bisa Hues cu su cliente R. ta para riba cu e no a mishi cu su yiunan.
Testigonan ta desmenti: E abogado a bisa cu e ta haya cu mester haya sa e berdad y no colga e sospechoso. El a menciona nomber di e sobrino E., kende tabata biba na e cas y tur atardi tabata na cas. El a splica cu e cas tabata consisti di dos camber y mey di e cambernan tabatin e baño.
Segun e abogado, E. a duna un declaracion na dje, caminda E. ta bisa cu ta dificil cu e actonan por a tuma lugar pasobra e lo por a scucha. E abogado a mustra Hues un cantidad di cartanan di hendenan cu a worde lanta door di R., caminda nan ta considera R. un persona masha humilde.
No tin prueba: Segun abogado, tur cos a sali for di un fuente, e yiu muher, kende a conta e ruman muher di e tata R.F. y asina e caso a cuminsa cana.
Segun mr. D. Croes, e yiu muher a menaza e mama R., cu e lo bay lag’e. El a mustra cu e muchanan actual tin 13 y 14 aña pues nan sa bon kico ta kico. E abogado ta haya cu e declaracion di e muchanan ta diferencia asina hopi. Despues di 7 aña e muchanan ta bay papia.
For di hopi tempo cu nan tabatin 3,4,5, aña a mishi y for di e tempo ey no a bisa nada. Ta despues di tur e tempo ey, nan ta bin cu e storia cu nan a worde abusa. Ta papia di 2012 a cuminsa cu e abusonan.
Un di nan ta bisa cu e mama tabatin full paña bisti ora ta baña nan y e otro ta bisa cu e mama tabata sunu. Un ta bisa cu ora e mama a cuminsa traha na 2013, nan a stop.
Segun abogado, ta e yiu muher despues cu na scol tabatin un combersacion den grupo riba abuso di mucha, a bin cu e declaracion cu su mama a abusa di nan.
Mester investiga e muchanan: E abogado a bisa cu e ta lamenta cu Hues no a honra su peticion pa scucha un experto di mucha cu por bisa si e muchanan ta gaña of no. E ta haya cu segun famia di e mama R., e muchanan ta gaña. El a mustra cu R. ta para riba cu e no a mishi cu su yiunan.
Na opinion di mr. D. Croes, door cu e tata R.F. a pone cuchio na garganta di e mama R., den presencia di e yiunan, e mucha homber a cuminsa pupu y pishi den su carson.
E abogado a bisa Hues cu e ta spera cu no ta asina cu e muchanan a declara contra nan mama pa nan por bay biba cerca nan tata. E muchanan a expresa cu cerca nan mama R., nan no ta sinti bon mientras cerca nan tabata si.
E abogado ta haya cu mester declara R. liber di tur acusacion pasobra no por proba esakinan.
Hues a bisa cu dia 10 di Juni 2022 lo tin sentencia.
