ORANJESTAD (AAN): Hues di Corte di Husticia den Promer Instancia a trata e caso penal cu Ministerio Publico a cuminsa contra e homber D. Fiscal ta acusa D. cu na 2006,
el a abusa sexual di su yiu muher R., kende e tempo ey tabatin 8 aña. Fiscal a exigi 3 aña di prison di cual 6 luna ta condicional cu un tempo di prueba di 2 aña.
Abusa di su yiu muher: Durante tratamento di e caso, acusado D. a desmenti di a abusa di su yiu muher R.
Hues a mustra cu aña pasa, ora cu e yiu muher R. (awor tin 23 aña) a bolbe di Grecia, el a haci denuncia contra su tata. El a worde interoga caminda el a bisa cu tempo cu e tabatin 8 aña, su tata a bras’e riba cama y a mishi cu su parti intimo. R. a bisa cu na tres occasion su tata D., a mishi cun’e.
Ademas di R., miembronan di KZP a scucha su ruman muher y su tantanan y tambe su mama. Tur ta papia di cu hopi aña pasa R. a yega di bisa nan cu D. a mishi cun’e y cu e mama di R. a bisa cu ta regla e asunto aki den famia mes y cu no ta bay Polis.
Ta asina cu un di e tantanan, cu ta e ruman muher di D., a bay reclama D. riba loke el a haci y D. a admiti di cu tempo ey cu e tabata adicto, el a mishi cu su yiu pero awor el a rehabilita.
Rekisitorio di Fiscal: Di parti di Ministerio Publico, Fiscal ta haya cu a keda legalmente proba cu D. a abusa di su propio yiu muher. Fiscal a cuestiona e hecho cu un tata ta abusa di e confianza cu su yiu muher mester tin den dje.
El a mustra tambe cu e abuso a keda traha riba e yiu te cu awor cu e yiu a dicidi di haci denuncia. Fiscal a exigi 36 luna di prison (3 aña) di cual 6 luna ta condicional cu un tempo di prueba di 2 aña.
Defensa di Abogado: Abogado mr. Mohamed a bisa Hues cu e ta haya cu no tin prueba di sosten y cu ta solamente declaracion di e yiu muher tin. E abogado a mustra riba sentencia di Corte Supremo cu ta mustra cu den casonan di abuso y inmoralidad, ademas di e declaracion di e victima mester busca prueba di sosten. Si no tin prueba di sosten no por castiga e sospechoso.
E abogado ta haya, cu mirando e declaracion di e yiu muher R.(23) na Polis, e ta bisa cu ningun momento su tata a penetr’e. E abogado ta conclui cu no por papia di abuso sexual y mester declara D. liber di e acusacion aki. E ta haya cu aki mester concentra riba actonan inmoral.
Na opinion di e abogado, e testigonan cu KZP a scucha, ta papia di cu hopi aña pasa R. a conta nan cu D. a abusa di dje pero no a bisa detayenan. Ta awor cu R. a bolbe di Grecia, el a bolbe bin riba e abuso di su tata D. y a bin cu mas detayenan. Mr. Mohamed ta haya cu no tin prueba di sosten y mester declara D. liber.
Hues a bisa cu e ta bay studia e caso y cu 3 Juni 2022, lo tin sentencia.
