Fiscal ta exigi trabao pa comunidad y castigo condicional - ORANJESTAD (AAN) – E dokter masculino A., diahuebs mainta a presenta den sala di Corte pa e caso penal cu Ministerio Publico a cuminsa contra dje.
Fiscal ta acusa dokter A. di a mishi (acto inmoral) cu su dos asistentenan femenino. E casonan tabata riba 19 Maart 2019 y 7 Februari 2019. Ta asina cu ademas di haci denuncia na KZP, e dos asistentenan a haci denuncia na AZV y HAVA.
Den Corte, dokter A. a para riba cu e ta inocente. Abogado mr. S. Kock a representa e dos asistentenan N. y V., kendenan no a presenta. victima. Fiscal ta haya dokter A. culpable y a exigi trabao pa comunidad y castigo condicional.
Abogado mr. Lejuez ta haya cu su cliente, dokter A. no ta culpable y cu e dos asistentenan a haci un set up contra dokter A.
MISHIMENTO DI ASISTENTENAN
Hues a mustra cu e dama N. a bisa cu dokter A. tabata yam’e dushi y cu e tin pianan dushi. N. lo a bisa su colega cu dokter A. ta pasa limite. Ariba pregunta di Hues, A. a bisa cu e lo por a bisa A. cu el a keda bunita pero nada bulgar. Hues a mustra tambe cu segun e dama N., dokter A. lo a mand’e WhatsApp. El a nenga di a manda WhatsApp na su asistente. Hues a bisa cu N. a mustra su partner esaki, kende a rabia.
Hues a mustra cu N. tabatin molester di dolor di lomba riba 19 Maart 2019 y dokter A. a pase hangua. Segun N., ora el a baha su paña, A. lo a expresa “waw” y cu e kier mira e bil di N. N., despues di a inyeccion a bisti su paña. Merdia N. a bolbe pero e dolor no a pasa. E dokter a ofrece su mes pa kraak su lomba.
Segun N., e dokter lo a bis’e pa kita su BH. Dokter A. a bisa Hues cu N. a bis’e pa los e BH. Segun N. e dokter lo a hunta su lomba cu lubricante y a para mey mey su pianan y tabata massage y despues caricia. El a bisa e dokter 3 biaha pa stop.
Segun N., dokter A. a tene su bilnan y sunchi na su lomba. Despues N. a manda WhatsApp pa dokter A. cu e no a gusta loke dokter A. a haci pasobra N. ta considera esaki mishimento sexual. E masashi no tabata apropia. Dokter A. a bisa cu el a pidi N. un reunion pasobra e no ta considera loke e tabata haci un mishimento sexual. El a pidi disculpa na N. y a bisa N. cu e ta contento cu N. ta trece esey padilanti.
Hues a mustra cu e partner cu N. a bisa cu el a lesa apps cu dokter A. a manda N. riba tattoonan. Dokter A. lo a bisa cu e kier mira e tattoonnan cu N. tin cu ningun hende por mira. Un dia N. bin cas laat y na yoramento a bisa e partner cu dokter A. a dun’e masashi pa dolor di lomba pero dokter A. a bay di mas door di tene N. su bilnan. Ta asina cu N. algun siman despues a kita.
Hues mustra cu e dama V. tambe a haci denuncia. E tabata traha mas tempo cu N. V. a declara na Polis cu dia 7 Februari 2019 tabatin trabou riba computer. E dia ey el a zak pa tene e cabelnan di computer na otro y dokter A. a yega mishi cu su bil y bisa pa lag’e wak si nan no ta traha. El a lanta y dal dokter A. un wanta. Segun V. den pasado dokter A. lo a haci expresionnan bulgar den su direccion. Segun V., el a conta su colega N. loke a pasa.
SET UP DI ASISTENTENAN
Dokter A. a bisa Hues cu el a kita V. pa ladronicia di placa for consultorio. E tabata sinti falta di placa di su cartera pa un tempo caba y el a dicidi di instala un camera scondi y a mira V. ta coy placa. Despues di a papia cu su abogado, a kita V. Segun dokter A., tur e cosnan aki ta manera un set up contra dje.
Ta asina cu e damanan V. y N. a haci keho na AZV y HAVA contra dokter A. Segun V., e ta hayando tratamento di psicologo. Dokter A., a bisa Hues cu V. ta trahando pa un otro dokter y cu su consultorio tin relacion cu e dokter aki.
DEMANDA DAÑO
Abogado mr. S. Kock a bisa Hues cu e caso aki a afecta e damanan N. y V. masha hopi. V., despues di 8 luna di su retiro, a bolbe bay traha cerca e dokter cu e tabata traha promer. V. a keda afecta pa loke dokter A. a haci cun’e y te ainda ta afecta. Pa loke ta N., e situacion tabata asina serio cu e mester a bay biba na Hulanda. Ambos ta exigi daño inmaterial di 7500 florin pa cada uno of di acuerdo na loke Hues ta haya ta husto.
FISCAL
Fiscal a bisa Hues cu tanto N. como V. a duna keho pero no tabatin testigo. Ta actonan inmoral cu no por permiti. Aki mester busca pruebanan di sosten. Aki tin declaracion di partner di ambos. Tin combersacion graba entre N. y dokter A. riba e forma con dokter A. a masashi su lomba, gara su bil y sunchi na su lomba. Fiscal ta haya cu esakinan ta suficiente prueba di sosten cu loke N. ta bisa ta berdad. Pa loke ta V., e ta haya cu tin suficiente prueba di sosten tambe.
Fiscal ta tene cuenta con e asistentenan a keda afecta door di loke dokter A. tabata haci cu nan. E ta haya cu mester duna un aviso na e dokter. Fiscal a exigi 150 ora di trabao pa comunidad of 75 dia sera. Tambe el a exigi 4 luna di prison di cual 2 luna ta condicional cu 2 aña di prueba.
Pa loke ta e demanda di daño inmaterial, Fiscal a bisa cu ta fastioso pasobra ta dificil pa determina con hende ta sinti. El a pidi pa declara no admisible pa den un caso civil determina esaki.
ABOGADO
Abogado mr. Lejuez a bisa Hues cu dokter A. ta desmenti categoricamente di a mishi cu e asistentenan. El a cuminsa cu e di dos acusacion, caminda e ta bisa cu dokter A. ta desmenti di a mishi cu e dama V. E abogado a mustra cu V. a cuminsa traha na 2016 pa dokter A. Na 2017, door cu dokter A. tabata perde placa for cartera, el a pone camera scondi. Dia 5 Februari 2019, el a mira con V. ta drenta y coy placa for su cartera y sali. Ta e mesun dia e abogado di dokter A., a conseha e dokter cu mester termina relacion di trabao cu V. Dia 7 Februari 2019, dokter A. den presencia di un colega dokter, a bisa V. cu e sa cu V. ta horta placa di dje. A. a bisa V. cu e por scoge di retiro voluntario of A. lo haci denuncia na Polis y kit’e. Segun mr. Lejuez, V. a firma un acuerdo di terminacion di trabou cu A. y a reconoce cu a horta placa for di A. Ta calcula mas o menos 4 mil florin en total a horta. Segun mr. Lejuez, 2 luna despues, 3 April 2019, V. y N. ta haci denuncia contra A.
V. ta bisa cu dia 7 Februari 2019, dokter A. ta mishi cu su bil y despues di e dia ey e no a bay traha mas. Pero ta 7 Februari 2019, el a firma cu e ta kita door di a horta.
Na opinion di mr. Lejuez, V. ningun momento a wordo mishi door di dokter A. pero kier laga pasa cu ta asina a sosode y cu el a tuma retiro. Mr. Lejuez ta mustra cu V. den su declaracion na Polis, ta bisa cu dokter A. a ofrece 300 florin pa e keda keto di loke a pasa. Esey no ta berdad. E abogado ta haya cu mester tin duda den declaracion di V. y cu mester declara dokter A. liber.
El a sigui bisa cu dia 3 April 2019, N. a haci denuncia. Esey ta mustra cu V. y N. a bay hunto haci denuncia di mishimento sexual contra dokter A. Tur esaki despues cu 7 Februari 2019, V. a tuma retiro entrante 2 luna. 1 April 2019 el a tuma su retiro y 3 April a haci denuncia.
E abogado ta haya cu V. y N. kier haya probecho financiero for di dokter A. door di haci denuncianan di mishimento. Pa loke ta N., dokter A. no a bisa N. pa kita BH. El a masashi N. y ningun momento a tene su bil y no a duna sunchi na su lomba. E ta haya cu mester declara dokter A. liber. El a pidi Hues pa rechaza e demanda di daño inmaterial.
Hues a bisa cu e ta bay studia e caso y dia 15 Juli 2021 pa 8.15 lo tin sentencia.
