Nan ta sera separa den KIA - ORANJESTAD (AAN): Den e caso di tiramento na San Nicolas, caminda e homber G.V.F. a tira e homber B.,
ta asina cu e rumannan G.V.F. y G.F. no ta bon cu otro. Por a ripara esaki ora cu e miembronan di CEA a trece nan den sala di Corte. G.V.F. a bay sinta na banda robez den sala mientras cu e ruman G.F. a bay sinta banda su amigo C.A.R. Hasta den KIA nan ta sera separa.
RUMAN A BAY SCONDE ARMANAN
E acusacionnan cu Fiscal a presenta den sala di Corte ta cu G.V.F. y G.F. a tira riba e homber B. y G.V.F a menaza e dama K. cu arma di candela. E trio G.V.F., G.F. y C.A.R. ta wordo acusa cu entre 21 Februari 2021 y 10 Maart 2021, nan tabatin armanan di candela y 17 bala. Tambe a acusa C.A.R. di tabatin un cantidad di cocaina.
Hues a mustra cu a haya un arma den e auto di C.A.R. Tambe a haya arma den auto di e ruman G.F. cu tabata para na un otro cas. Segun G.F., e armanan ta di su ruman G.V.F.
KEN TA ESUN CU A TIRA?
Hues a puntra e ruman G.F. si e tabatin arma den auto. El a bisa cu ta G.V.F. so tabatin arma. Hues a bisa cu testigonan a declara cu tanto G.F. como G.V.F. a sali for di auto cu arma. Hasta cu tin testigo cu ta bisa cu G.F. a menaza e dama K. cu un arma. G.F. a bisa Hues cu esey no ta berdad. El a bisa Hues cu e no tabata sa cu G.V.F. tabatin un arma. Ta ora el a baha for di auto, el a mira G.V.F. saca arma y dirigi riba B. G.F. a bisa cu el a purba stop G.V.F. El a bisa cu e no conoce B. pero e dama K. si. El a bisa cu su ruman G.V.F. tabatin un revolver pero e no a mira cu G.V.F. a menaza e dama K.
RUMANNAN TA CULPA OTRO
Hues a bisa cu G.V.F. a bisa cu ta G.F. a menaza K. cu arma. E dama K. a bisa Polis, cu e persona a primi gay dos biaha pero ningun bala a sali. Segun G.V.F., esey ta estilo di su ruman G.F. cu ta laga dos bala afor. Segun G.F. ta su ruman G.V.F. tabatin un bala su den e arma y tabata busca bala pa cumpra. El a bisa cu e 3 armanan tabata di G.V.F. y el a puntra C.A.R. pa warda e armanan. Segun G.F. el a tende cu G.V.F. a bisa cu ta G.F. a tira, el a dicidi di busca e armanan y hiba pa C.A.R. pa e bay sconde nan den un auto cu no ta core pa e ora ey e bay Polis y mustra unda e armanan tabata scondi. Ta asina cu G.F. lo a coy un revolver color di plata for di G.V.F. y tabatin esaki scondi. El a bisa cu el a haya un saco di plastic cu armanan. E no a habri e saco pero a sinti cu ta armanan di candela. Segun G.F. e arma cu su ruman a tira cun’e y un otro arma tabata den e saco. C.A.R. a saca nan y separa nan di otro. Na momento cu C.A.R. tabata coriendo den auto, Polis a par’e y a hay’e cu un arma. Segun C.A.R., e tabata hibando e arma pa Polis y a wordo para pa Polis. E ora ey C.A.R. a bisa cu e otro arma ta den un auto. Hues a mustra cu Polis a haya un otro revolver color di plata. Segun G.F. esey ta un otro revolver di G.V.F. cu e tabatin scondi y a pone esaki tambe den e auto. C.A.R. a bisa Hues cu e no tabata sa di e di tres arma cu a haya den auto. Ta asina cu C.A.R. a wordo haya cu cocaina. El a bisa cu segun occasion e sa usa cocaina.
RUMAN NO TA BON CU E OTRO RUMAN
Ta asina cu G.V.F. no ta bon cu su ruman G.F. y nan ta sera na KIA den diferente seccion. Durante e interogacion di Hues por a ripara cu G.V.F. no ta nada contento cu su ruman G.F. a papia tur cos.
